Teuta ka fituar kundër Partizanit në ndeshjen hapëse të javës së katërt të kampionatit kombëtar në basketboll për meshkuj.
Bregdetarët e Nikola Milatoviçit nuk falën në shtëpi përballë “demave”, duke regjistruar një triumf në shifrat 86-74, në një takim të cilin e udhëhoqën nga fillimi e deri në fund.
Ky ishte suksesi i dytë në kampionat për Teutën, që arrin të reagojë pas disfatës që pësoi një javë më parë në Shkodër kundër Vllaznisë. Ndërsa nga ana tjetër, Partizani, pësoi humbjen e tretë në katër takime.
Njeriu i ndeshjes mbrëmjen e djeshme në “Ramazan Njala” ishte amerikani Patrick Bacon, i cili për pak nuk preku tripletën dyshifrore për vendësit.
Teuta e nisi takimin në mënyrën e duhur, me efikasitet të lartë në sulm dhe me një fazë mbrojtje solide, ndërsa Partizani u pa menjëherë në vështirësi.
Durrsakët fituan 22-8 në periodën e parë, ndërsa e fillojnë mjaft mirë edhe çerekun e dytë, duke thelluar deri në +24 pikë, kur kishin mbetur edhe 3 minuta nga fundi i periodës.
Kështu edhe perioda e dytë mbyllet 27-23 për durrsakët, të cilët shkojnë në pushim në shifra të përgjithshme me avantazhin 49-31. Me gjithë përpjekjet e skuadrës së Erdal Borovës në pjesën e dytë, vendësit e administrojnë epërsinë, duke marrë triumfin në shtëpi.
Pesë lojtarë të Teutës regjistruan kuotë dyshifrore pikësh, ndërsa MVP u shpall Bacon. Amerikani tregoi një formë fantastike, duke u aktivizuar përgjatë 40 minutave, për të shënuar 34 pikë, 12 kërcime dhe 8 asiste.
Në radhët e Partizanit spikati kapiteni Abdel Gjyzeli, me 20 pikë, 10 kërcime dhe 2 asiste.
Java e katërt do të vijojë sot me dy ndeshjet e radhës, fillimisht në orën 13:00 në Korçë do të luhet sfida Skënderbeu-Fieri, ndërsa në orën 18:00 Vllaznia pret Kamzën në Shkodër.
Dy takimet e tjera do të zhvillohen nesër në orën 18:00, me Tiranën që pret kryesuesit e Elbasanit, ndërsa Besëlidhja do të përballet me Flamurtarin.
