Anëtari i Kryesisë së PD-së, Belind Këlliçi, dorëzoi më datë 18 tetor të këtij viti në SPAK, një material me mbi 650 faqe për aferën e inceneratorëve.
Në një deklaratë nga selia blu Këlliçi deklaroi se pjesë e materialeve janë dokumente me rëndësi për hetimin, por nuk bëri publik asnjë dokumentacion.
Ndërkohë ditën e sotme është publikuar edhe shkresa në të cilën mësohet se Kelliçi i jep informacion të detajuar Dumanit sesi shtetasit Alberto Presezzi dhe të tjerë, kanë mashtruar në deklarimet e tyre përpara prokurorëve Italianë. Ata kanë gënjyer, për takimet e kryera në disa shtete mes aksionerëve.
Këlliçi informoi gjithashtu Dumanin, duke i vënë në dispozicion dhe komunikim shkresor midis ministrit, Lefter Koka dhe Arben Ahmetaj, ku Koka garanton Ministrinë e Financave që kompania do të investojë me kapital aksioner 100.5 milionë euro pasi njëri nga investitorët ishte Paul Wurth Italia.
E vërteta qëndron ndryshe, pasi kompania e huaj është përdorur thjesht si “presta nome” pasi është larguar si aksioner pa u mbyllur viti 2017.
Këlliçi bëri me dije gjithashtu se materiali përmban të dhëna autentike si:
- Kontrata të nënshkruara mes palëve.
- Dokumentacion zyrtar të cilin SPAK nuk e ka gjetur pranë Institucioneve Shqiptare.
- Komunikime elektronike mes palëve si dhe shumë dokumente financiare.
