Rrajat shfaqen sërish protagonistë në raportimet e kronikës së zezë. Këtë herë është nipi i ish-deputetit të PS Rrahman Rraja i cili është kapur nga policia në kryeqytet me një sasi kokaine teksa lëvizte me automjet.
Në mjet u gjet dhe një sasi parash, që është sekuestruar.
“U arrestua shtetasi A.Rr. (Arjel Rraja), 22 vjeç, banues në Nikël, Krujë, pasi gjatë kontrollit fizik dhe kontrollit në automjetin që drejtonte, shërbimet e Policisë gjetën sasi lënde të dyshuar narkotike kokainë dhe shuma parash, të cilat u sekuestruan në cilësinë e provës materiale, së bashku me automjetin”, njoftoi policia e Tiranës.
Për herë të fundit, Rrajat u shfaqën protagonistë në raportimet e kronikës disa muaj më parë, kur disa anëtarë të këtij fisi dhunuan shtazërisht dy kushërinjtë Maja. Episodi i dhunës erdhi pasi të lënduarit kishin bërë kallëzim në polici se gurorja e njërit prej anëtarëve të fisit Rraja, për shkak të shpërthimeve që aplikonte, u kishte dëmtuar banesat. Majat akuzuan policinë se kishte favorizuar dhunuesit duke vepruar me vonesë dhe lehtësuar pozitën e tyre.
Ariel Rraja është pikërisht djali i Flamur Rrajës (vëllait të Rrahaman Rrajës), i përfshirë në ngjarjen e ndodhur në Gusht 2023 në Fushë-Krujë, ku u dhunuan Jashar Maja dhe Bilbil Maja.
Flamur Rraja vijon të mbetet ende në kërkim për ngjarjen që solli edhe dorëheqjen si deputet të Rrahman Rrajës.
Përveç dyshimeve të veprimeve të policisë në favor të Rrajave, mosbesim nga të lënduarit pati edhe te prokuroria, që zbuti akuzat ndaj të akuzuarve pas një raporti mjeko-ligjor. Vetëm pasi rastit iu dha jehonë në media, akuza kërkoi një riekspertimin të dytë mjekësor.
