Jamarbër Malltezi apelon masën e sigurisë “arrest në burg”. Përmes avokatëve të tij, Malltezi ka kundërshtuar masën e dhënë nga GJKKO, duke e cilësuar si të pabazuar në ligj dhe prova.
Ai u arrestua me urdhër të SPAK në Aeroportin “Nënë Tereza”, një javë më parë, teksa priste bashkëshorten që kthehej nga një shtet europian.
Gjykata kundër Korrupsionit dhe Krimit të organizuar la në fuqi masën e sigurisë “arrest me burg” për dhëndrin e ish-kryeministrit Sali Berisha, Jamarbër Malltezi.
Ai akuzohet për korrupsion pasiv mbi privatizimin e ish-kompleksit Partizani. Për këtë çështje është vendosur masë sigurie edhe për Sali Berishën. Me kërkesë të SPAK, për Berishën është caktuar masa “detyrim për paraqitje” dhe “ndalim i daljes jashtë vendit” pas një seance disa ditore, që kreu i PD dhe avokatët e tij e cilësojnë “nul”.
Gjatë deklaratave publike, Berisha i ka cilësuar akuzat politike dhe ka argumentuar pse sipas tij prokuroria e SPAK Enkeleja Millonai dhe gjyqtarja Irena Gjoka kanë shkelur Kushtetutën duke anashkaluar Kuvendin në masën ndaj tij. Po ashtu, është shprehur se ato kanë vepruar nën urdhrat e kryeministrit Edi Rama.
Edhe Malltezi, gjatë dëshmisë së tij në gjykatë, e ka cilësuar çështjen politike duke rrëzuar akuzat ndaj tij.
“Asnjë lek nuk kam marrë kurrë nga fondet publike në jetën time. Kam zhvilluar pronën private të trashëguar me dashuri e respekt për njerëzit dhe natyrën. Pse bëjnë shfaqje dhune me arrest me rrëmbim personi pa më pyetur kurrë e pa sqaruar? A nuk bie erë diktaturë,” u shpreh Malltezi.
