Prokurorja e Durrësit, Anila Bebeci u konfirmua në detyrë. Vendimi u shpall këtë të enjte nga Komisioni i Pavarur i Kualifikimit, KPK.
Procesi i vetingut për këtë subjekt rivlerësimi u krye nga trupa e KPK e kryesuar nga Valbona Sanxhaktari, me relator Olsi Komicin dhe anëtare Firdes Shulin. Në cilësinë e vëzhguesit ndërkombëtar ishte i pranishëm Steven Kessler.
Anila Bebeci e ka nisur karrierën në sistemin e drejtësisë në vitin 1994 dhe punon prej më shumë se dy dekadash si prokurore pranë Prokurorisë së Durrësit.
Bebeci u përball të hënën më 23 tetor me KPK, kur gjatë seancës dëgjimore dha shpjegimet për barrat e provës në kriterin pasuror lidhur me bilance negative, si dhe për disa gjetje në kriterin profesional. Ajo pranoi se në tre vite nuk kishte deklaruar kursimet cash, por pretendoi se kishte pasur të ardhura të mjaftueshme dhe se e kishte korrigjuar këtë pasaktësi. Bebeci mori vlerëism pozitiv për pastërtinë e figurës.
