Oficerët e Policisë kanë shkuar mëngjesin e kësaj të shtune tek blloku i pallatave të ndërtuara tek ish-kompleksi “Partizani”.
Përfaqësues të krimit ekonomik ndodhen në brendësi të kompleksit me qëllim për të zbatuar vendimin e shkallës së parë të GJKKO për sekuestrimin e pasurive të dhëndërit të ish-kryeministrit Berisha, Jamarbër Malltezi.
Për të, GJKKO ka vendosur sekuestro për 16 pasuri të paluajtshme, 6 llogari bankare dhe aksione në tre kompani..
Dhëndri i Sali Berishës dyshohet nga SPAK-u për “korrupsion aktiv” dhe “pastrim parash”, në vijim të procedurave të privatizimit të kompleksit sportiv, ku ai është një prej trashëgimtarëve ligjorë, si edhe shndërrimin e truallit në zonë rezidenciale banimi. Bashkë me Malltezin, SPAK-u ka ngritur dyshime edhe mbi vetë Berishën, për veprën penale të “korrupsionit pasiv” dhe gjykata e posaçme ka caktuar ndaj tij masën “detyrim për paraqitje”.
Sipas prokurorisë, Malltezi, duke u favorizuar nga pozita e Sali Berishës si kryeministër, ka përfituar 5.4 milionë euro aksione në një kompani nga biznesmeni Fatmir Bektashi, në shkëmbim të veprimeve favorizuese qeveritare. Sipas SPAK-ut, Berisha kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”. Ndërsa, për Jamarbër Malltezin dhe ndërtuesin Fatmir Bektashi, edhe ky i fundit nën masën “detyrim për paraqitje”, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
Berisha hodhi poshtë akuzat në një deklaratë për mediat ndërsa e cilësoi hetimin e SPAK politik dhe të dirigjuar nga kryeministri Edi Rama për të goditur opozitën. Berisha u shpreh se vendimi për të transformuar truallin nga zonë sportive në truall për ndërtim është marrë nga Edi Rama kur mbante postin e kryebashkiakut të Tiranës.
