Një operacion blic është zhvilluar mëgjesin e kësaj të marte në Elbasan, për kapjen e Suel Çelës, i shpallur në kërkim për porosi vrasjeje.
Policia në bashkëpunim me agjentët e BKH-së, kryen kontrolle në tregun ushqimor, në disa lagje të qytetit si dhe në banesën e të shumëkërkuarit.
Si rezultat mësohet se është shoqëruar babai dhe vëllai i Suel Çelës, të cilët do të merren në pyetje lidhur me vendodhjen dhe kontaktet që kanë patur me këtë të fundit. Gjithashtu janë sekuestruar edhe disa materiale që mendohet se do i shërbejnë hetimeve.
Kujtojmë se Suel Çela është shpallur në kërkim në maj të vitit 2022 në kuadër të operacionit “Plumbi i Artë” të organizuar nga SPAK. Sipas dëshmisë së Nuredin Dumanit ai është porositës i tre ngjarjeve 2 të parealizuara dhe 1 e mbetur në tentativë.
Suel Çela akuzohet se ka porositur atentatin e dështuar të 29 marsit 2022 ndaj Elton Kilës, që do ta kryente bashkëpunëtori i drejtësisë, Nuredin Dumani, por i cili mbeti i plagosur rrugës dhe më pas u arrestua.
Çela nga Elbasani, rezulton i dënuar në Itali për trafikim narkotikësh, por ai ka arritur t’i shpëtojë burgut. Në nëntor 2019, Gjykata e Elbasanit vendosi ta shpallë të pafajshëm Celën për sulmin ndaj policisë tek tregu ushqimor i Elbasanit.
