Nga Boldnews.al
Administratori i ri i OSHEE-së Enea Karakaçi, një vartës i besuar i Belinda Ballukut, ka lëshuar dorën e parave publike. Brenda një kohe të shkurtër, “satelitët” e këtij operatori kanë shpenzuar plot 14 milionë euro. Jo për punë publike, rrjete të tensioneve, transformatorë, por për makina.
Me të drejtë, mjetet e OSHEE-së mund të konsiderohen si “të arta”, pasi kanë marrë një pjesë të mirë të fondit. Me procedura të dyshimta, Karakaçi ka urdhëruar bërjen e disa procedurave, ku më e fundit është mirëmbajtja e këtyre mjeteve. Por, nëse janë marrë me qira, përse nuk i mirëmban firma që i lëshon me qira? A nuk do t’i kalojnë kësaj firme në fund të përfundimit të afatit kohor? Para ‘mbi para’, pasi në këtë mënyrë shpenzohet disa herë për të njëjtin shërbim.
Shpallja e njoftimit të tenderit me vlerë rreth 2 milionë euro për mirëmbajtjen e mjeteve të OSSH-së
Sipas dokumenteve që disponon redaksia e BoldNews.al, disa ditë më parë, OSSH-ja (firma satelite të OSHEE-së) ka shpallur fituesin e tenderit “mirëmbajtja e mjeteve motorike në pronësi të OSSH sh.a”. Fondi limit ose vlera e pritshme e kontratës ka qenë plot 178.821.930 lekë pa TVSH, ose me TVSH mbi 2 milionë euro. Një shumë e konsiderueshme për mirëmbajtjen, pasi dhjetëra miliona euro të tjera janë shpenzuar për blerje apo qira. Madje, vlera e qirasë arrinte në 37 mijë euro për 1 automjet. Kjo vlerë është kostoja reale e mjetit, i cili pasi përdoret rreth 2 vite i kthehet koncesionarit pa asnjë kosto tjetër, pasi edhe mirëmbajtja gjatë kësaj periudhe tenderohet, madje me vlera të larta.
Në dokument shkruhet se kohëzgjatja e mirëmbajtjes është 24 muaj, aq sa janë në fuqi edhe kontratat e qirasë. Në tender kanë marrë pjesë disa shoqëri, ku fitues ka dalë firma “ALSTEZO” me ofertë ekonomike 176.660.000 lekë pa TVSH. Tre firmat e tjera në garë janë s’kualifikuar, e para për arsye se nuk plotëson kriterin profesional, e dyta s’kishte paraqitur formular për taksat dhe e treta “nuk ka paraqitur ofertë ekonomike”. Dyshime të mëdha se gjithçka ka qenë formale dhe me fitues të paracaktuar.
OSHEE shton paratë për Agron Papulin, 6 mln euro për tenderin e makinave me qira
Raportimi i BoldNews.al për marrjen me qira nga OSHEE të automjeteve
Disa javë më parë, redaksia e BoldNews.al publikoi një investigim se OSHEE i kishte shtuar kontratën firmës koncesionare. “Enea Karakaçi ka firmosur dhënien aforfe të një shumë prej 1 milionë eurosh për oligarkun e automjeteve Agron Papuli. Një aferë e pastër, pasi kontrata e parë mes OSHEE-së dhe CLASSIC ishte lidhur pak kohë më parë, me një vlerë prej 5 milionë eurosh. Por, me këto ndryshime, OSHEE-ja do t’ia falë këtë shumë, pasi vetëm me një amendim oligarku do të marrë shumën përkatëse”, shkruante redaksia e BoldNews.al disa javë më parë.
Sipas dokumenteve, bëhet fjalë për “amendim kontrate për shtyrje afati ‘Marrjen me qira operacionale të automjeteve për nevojat e “OSHEE GROUP sh.a”. Vlera e kësaj procedure ishte plot 93.996.000 lekë. Nuk është tender por vetëm një amendim, para’ aforfe për një nga përfituesit më të mëdhenj të fondeve publike. Por, kur këto para jepen nga një institucion që tashmë është lidhur fort pas Ballukut, diçka “bie erë”. Përse OSHEE bën këtë amendim dhe i fal 1 milionë euro? Kush është pazari mes Papulit, Karakaçit dhe Ballukut? A nuk duhej bërë tenderi i ri, kësaj herë jo për makina me qira por për të blerë këto mjete?
Në vitin 2020, OSHEE bëri një super tender, për të marrë makina me qira. Objekti i tenderit ishte “marrjen me qira operacionale të automjeteve për nevojat e OSHEE sh.a’. Në procedurën e atëhershme kishte vetëm një ofertë, atë të “Classic” sh.p.k dhe “Classic Rent a Car” me vlerë 469.980.000 lekë pa TVSH. Pra një tender në atë kohë pa garë, ndërkohë që po pa garë Papuli fitoi sërish 1 milionë euro nga ky amendim.
