Policia njoftoi sot arrestimin e 56-vjeçares Lumturie Gjana nga Tirana, pasi akuzohet se nëpërmjet mashtrimit ka përvetësuar një shumë prej mbi 8 mijë eurosh.
Ajo i ka marrë 8850 euro një 50-vjeçare me pretendimin se do ta ndihmonte për plotësimin e dokumenteve të nevojshme, për pajisjen me pasaportë bullgare, për fëmijët e saj.
Rasti është denoncuar mbrëmjen e sotme në emisionin Stop, pas denoncimit të qytetares, e cila tregon se Lumturie Gjana është mësuese kuzhine në qendrën e kurseve AKPA.
Historia nisi në Janar 2023 kur filloi t’i jepte shumat e parave. Deri tani, denoncuesja ka paguar 8850 Euro me premtimin se Lumturia do t’i pajisë dy fëmijët e saj me pasaporta bullgare. Eurot u morën dhe pasaportat nuk u bënë kurrë.
“Ajo është zysh, zysh kuzhine. Jam njohur tek kursi AKPA, që jep kurse, edhe më tha unë dua të të ndihmoj që të bëj pasaportat e fëmijëve të tu, domethënë bullgare. Më tha dua 6000 Euro. I kërkoi 3000 Euro ditën e parë, pastaj pas 3 ditëve 3000 Eurot e tjera. Pasi kaluan 1 javë e ca, 2 javë, më tha t’ja bëjmë dhe çunit tjetër pasaportën? OK i them. Vazhdoj mbledh lekët se nuk i kisha. Bëhen 8850 Euro. Ajo për 45 ditë më tha afatin që do bëjë pasaportën. Kalojnë me muaj, ajo vetëm se gjente justifikim u sëmura sot, u sëmura nesër. Që as letra nuk më bëri, as pasaportën nuk më bëri, por as lekët nuk m’i kthen”, thotë denoncuesja.
Një tjetër premtim, për të cilin Lumturia është paguar 300 mijë lekë të vjetra, është se do ta fuste zonjën në punë si ndihmëskuzhiniere në një kopsht apo çerdhe. As ky premtim nuk u mbajt.
“Më premtoi shumë gjëra të tjera. Më premtoi punën që më mori lekët. Nuk më futi në punë. Pagova 300 mijë Lekë. 200 mijë më tha i dua për drejtorin se mos të zenë vendin e punës, ia dhashë. Pastaj më tha kam nxjerrë shkollën e mesme pa arsye, unë s’ja kërkova, pastaj më tha dua dhe 40 mijë Lekë për noterizim dhe u bën 300 mijë Lekë për punën time. Do punoja si ndihmës kuzhinier në çerdhe. Unë dua lekët e mia, nuk dua as pasaporta asnjë gjë. E di që ky ka qenë një mashtrim. Më ka mashtruar, m’i ka marrë një pas një lekët”.
Denonncuesja tani kërkon paratë mbrapsht. Ajo është takuar dhe ka komunikuar disa herë me Lumturien, por kjo e fundit prej 9 muajsh e mban me premtime duke e mashtruar.
Lumturie Gjana: Më tha –“O Lul unë i kam dorëzuar, po problemi është, që unë po pres të lirohet sa më afër, që të jetë e mundur. I thashë ta çojmë atje, ku ka për momentin, pastaj e bëjmë lëvizjen. Në qoftë se do të shkojë të Rruga e Elbasanit, të Brryli janë 3 çerdhe për momentin.
Denoncuesja: Shkoj, shkoj moj zemër.
Lumturie Gjana: Më tha më kthe përgjigje dhe të fillojë direkt të hënën në mëngjes. I thashë të Brryli është içik larg, se ajo e do për zonën këtu.
Denoncuesja: O shpirt të vazhdoj punën njëherë!
Lumturie Gjana: Për atë Zot unë jam zhyt 9800 euro me atë person, e unë kam fut tjetër, që po iu bën çunave, që të shkojnë vetëm për paqe. E hëna është e fundit dhe të betohem me mish e shpirt. Mbylle këtë histori! Unë ditën e hënë në i merr çunat atje, në s’i mori do të t’i plas unë lekët bam, bam, bam. Më le mua tashi, se do të përgjigjem unë! Deri tashi kam mbajt për hatër të atij, (djali I tezës së saj) se e di, që punon. Eshtë një shprehje, “kur s’ka pula mos bëj lulish”.
Denoncuesja: Çfarë më bëre për çunat? Për pasaportat e çunave?
Lumturie Gjana: Po ti më the leje, i do, s’i do, ato janë gati. Me datë 24, po të duash me i nis, nisi! Po të duash nisi, për mua i ke gati. A do me i nis?
Denoncuesja: Po! Po puna ime?
Lumturie Gjana: Punën tate si të duash ti, ç’a të thotë Luli tashti?! A po vjen ditën e martë, të të çoj? Hajde ditën e martë në orën 8, aty tek ajo kulla. Hajde të martën, të të çoj atje! Ika! Hajde shpirt, paçim!
Lumturie Gjana i ka lënë afat 31 Tetorin për t’i kthyer paratë që i ka marrë.
