Zëdhënësi i Organizatës Botërore të Shëndetësisë (OBSH), Tarik Jashareviç, i bëri thirrje Izraelit që të rishqyrtojë urdhrin për evakuimin e pjesës veriore të Rripit të Gazës, duke vlerësuar se është “pothuajse e pamundur” zbatimi i këtij urdhri.
“Ka pacientë që thjesht nuk mund të lëvizin, shumë janë në ventilatorë mekanikë, ka të porsalindur në inkubatorë, njerëz në një gjendje të paqëndrueshme dhe është shumë e vështirë t’i lëvizësh”, tha Jashareviç për BBC.
Ai kujtoi se të shtunën, katër kamionë me materiale kirurgjikale dhe medikamente hynë në Gaza përmes pikës kufitare Rafah, “por kjo nuk mjafton”.
