Ashtu siç ishte paralajmëruar, ka nisur protesta e studentëve të Universitetit të Mjekësisë së Tiranës para godinës së Ministrisë të Arsimit dhe Sporteve. Ndryshe nga herët e tjera protesta po zhvillohet në orët e pasdites pasi pritet që të bashkohen dhe prindërit.
Ata po protestojnë kundër ligjit të miratuar nga mazhoranca, që u mban “peng” diplomat, 5 vite pas përfundimit të studimeve, duke mos i lejuar që profesjonin e tyre ta ushtrojnë jashtë vendit, ligj i cili ka shkuar tashmë edhe në Gjykatën Kushtetuese.
Studentët kanë vendosur të hedhin sërish, njësoj si herën e fundit që protestuan, letra higjenike drejt godinës së Ministrisë së Arsimit, kanë bllokuar Rrugën e Durrësit, ndërsa i bëjnë thirrje ministres Ogerta Manastirliut të japë dorëheqjen.
Që prej nisjes së vitit akademik, studentët e mjekësisë kanë refuzuar të futen në auditore për sa kohë nuk anulohet ligji.
