Dy përfaqësues të policisë kanë hyrë në ambientet e selisë së Partisë Demokratike, aty ku ish-kryeministri Sali Berisha ndodhet akoma pas përfundimit të konferencës së jashtëzakonshme.
Dy punonjësit, Gentian Ndoi, shefi i krimit ekonomik në Drejtorinë e Përgjithshme të Policisë dhe Elvis Doda kërkojnë të kenë kontakt me ish-kryeministrin Berisha, i akuzuar për veprën e korrupsionit pasiv nga SPAK në procedimin për cështjen e privatizimit të kompleksit Partizani. Bëhet fjalë për një procedurë standarde që ndjek policia për ta njohur kryedemokratin me vendimin e gjykatës.
Ndaj Berishës, është ngritur akuza e korrupsionit pasiv nga SPAK dhe është caktuar nga GJKKO masa e detyrim paraqitjes në mungesë dhe ndalimin e largimit jashtë vendit.
Në një konferencë për mediat, Berisha mohoi akuzat e prokurorisë, ndërsa i quajti masat politike. Urdhëruesi sipas tij, është kryeministri Edi Rama i cili ka përdorur Prokurorinë e Posacme.
