Ndihmat e nevojshme duhet t’u dërgohen menjëherë civilëve në Rripin e Gazës, i cili është mbyllur nga Izraeli, tha sot sekretari i përgjithshëm i Kombeve të Bashkuara, António Guterres.
“Civilët në Gaza kanë nevojë dëshpërimisht për shërbime dhe furnizime thelbësore”, tha Guterres në një postim në X, dikur Twitter.
“Ne kemi nevojë për qasje të shpejtë dhe të papenguar humanitare. Ne kemi nevojë për ushqim, ujë, ilaçe dhe karburant tani”,tha Guterres, i cili ndodhet në Egjipt për të diskutuar hapjen e kalimit kufitar Rafah.
Izraeli mbylli kufirin e tij me territorin palestinez të drejtuar nga Hamasi dhe e vendosi atë nën një bllokadë totale pasi qindra militantë islamikë kaluan kufirin nga Gaza në Izrael në një sulm të befasishëm, në shkallë të gjerë më 7 tetor që synonte bazat ushtarake, komunitetet civile dhe një Festival muzikor. Mbi 1400 njerëz u vranë.
Kalimi i vetëm midis Gazës dhe Egjiptit, kalimi Rafah, mbetet i mbyllur pavarësisht thirrjeve në rritje që Egjipti dhe Izraeli të lejojnë dërgimin e ndihmave.
Izraeli kishte rënë dakord të hapte vendkalimin për dërgimin e ujit, ushqimit dhe ilaçeve. Megjithatë, nuk përmendej karburanti, i cili nevojitet për të prodhuar energji elektrike dhe nga i cili varen dëshpërimisht spitalet e mbipopulluara të Gazës.
Presidenti i SHBA-së, Joe Biden tha të mërkurën se presidenti egjiptian Abdel-Fatah al-Sissi kishte rënë dakord të hapte vendkalimin dhe të lejonte fillimisht deri në 20 kamionë të ndihmave.
Rreth 165 kamionë me ndihma janë rreshtuar në anën egjiptiane të kufirit me Gazën.
Sipas Egjiptit, rrugët hyrëse në Rripin e Gazës të dëmtuara nga sulmet ajrore izraelite duhej të riparoheshin fillimisht.
Saktësisht se kur do të hapej Rafah mbetet e pasigurt, por Organizata Botërore e Shëndetësisë dhe Biden parashikuan se kjo do të ndodhte sot.
