Policia e Tiranës ka arrestuar dy adoleshentët e shpallur në kërkim, të cilët pasditen e 18 tetorit, tentuan të vrisnin me armë zjarri një 16-vjeçar në Kamëz, duke e lënë të plagosur.
Në kuadër të operacionit policor të koduar “Catch” është vënë në pranga shtetasi Armir Hasa, 18 vjeç dhe bashkëpunëtori i tij, shtetasi Xh. Ç., 19 vjeç, të dy banues në Kamëz.
Ngjarja ka ndodhur pasditen e 18 tetorit, rreth orës 16:10, në rrugën “OSBE”, pas një konflikti mes tyre për motive të dobëta. Burime për mediat bëjnë me dije se autori dhe i plagosuri janë shokë në lagje me njëri-tjetrin. Ata njiheshin prej vitesh dhe më herët nuk rezulton që të kenë pasur zënka apo konflikte.
“Nga veprimet hetimore dyshohet se këta 2 shtetas, më datë 18.10.2023, pas një konflikti të çastit për motive të dobëta, kanë tentuar të vrasin me armë zjarri 16-vjeçarin, i cili ndodhet në spital, në kujdesin e mjekëve.” – thuhet në njoftimin e Policisë.
Blutë e kryeqytetit kanë sekuestruar në cilësinë e provës materiale automjetin me të cilin dy autorët e dyshuar janë larguar nga vendi i ngjarjes.
Materialet i kaluan Prokurorisë së Tiranës për veprime të mëtejshme për dy personat e arrestuar.
