Belgjikë-Suedi nuk do të luhet sërish, ndërsa skuadrat do të ndajnë nga 1 pikë, ashtu siç ishte dhe rezultati përgjatë kohës së luajtur të ndeshjes. Ky vendim është marrë nga UEFA, e cila ka bërë të ditur se në këtë situatë dhe pas atij sulmi të regjistruar, skuadrat nuk do të rikthehen më në fushë.
“Sa i përket ndeshjes kualifikuese evropiane mes Belgjikës dhe Suedisë, e ndërprerë në pjesën e parë me kërkesë dhe marrëveshje të dy skuadrave, pas sulmit terrorist që vrau dy tifozë suedezë në Bruksel më 16 tetor, Komiteti Ekzekutiv i UEFA-s vendosi sot se: Ndeshja është ndërprerë dhe rezultati i pjesës së parë cilësohet ai përfundimtar, ku secilës skuadër i jepet 1 pikë në grupin F”, thuhet në njoftimin e UEFA.
Me këtë rezultat asgjë nuk ndryshon në grup, pasi Belgjika e kishte siguruar më parë kualifikimin në Evropian, ndërsa skuadra tjetër ishte Austria, teksa suedezët qëndrojnë në vendin e tretë me 6 pikë.
Kujtojmë se përballja e cila luhej ditën e hënë u ndërpre pas 45 minutave për shkak të një sulmi terrorist në rrugët e qytetit të Brukselit, ku një terrorist i armatosur vrau dy tifozë dhe plagosi disa qytetarë.
Ngjarja u regjistrua në afërsi të stadiumit ku kombëtarja e djajve luante me Suedinë, teksa pas arritjes së forcave policore u bë i mundur neutralizimi i autorit.
