Presidenti turk Recep Tayyip Erdogan ka dënuar sulmin e djeshëm në një spital në Rripin e Gazës, i cili thuhet se shkaktoi vdekjen e qindra civilëve, duke e konsideruar atë një “gjenocid”, pa përmendur asnjë fajtor.
“Dje masakra në Gaza u përshkallëzua në një dimension tjetër me sulmin e urryer në spitalin “Arab Al Ahli”, tha Erdogan në platformën e medias sociale X.
“Dënoj autorët e këtij sulmi, i cili përbën një krim kundër njerëzimit dhe një gjenocid kundër popullit të Gazës”, shtoi lideri turk.
Deklarata e tij erdhi disa orë pasi një zëdhënës i partisë tha se Ankaraja do të mbajë një zi kombëtare treditore për të dënuar sulmin në spitalin e Gazës.
Turqia dhe Izraeli kohët e fundit kishin njoftuar planet për të rivendosur lidhjet e tensionuara prej një dekade.
Qeveria e Erdoganit po negocion më vete me militantët e Hamasit për lirimin e pengjeve ndërkombëtare.
