Kryetari i Partisë Demokratike, Sali Berisha deklaroi sot pas seancës plenare së Kuvendit se, “opozita defakto është përjashtuar nga parlamenti si opozitë sovrane, në të cilën asaj në përputhje me Kushtetutën i takon të përmbushë detyrimet ndaj qytetarëve që kanë votuar kundër qeverisë”.
Por, shtoi Berisha në një komunikim me gazetarët, “me vendimet antikushtetuese të Edi Ramës, i cili ka marrë përsipër për herë të parë në histori t’i emërojë bashkëkryetarin që do ai opozitës dhe jo atë që zgjedh opozita vetë. T’i emërojë dhe t’i rrëmbejë edhe postin e kryetarit të grupit parlamentar. Me bllokimin total të çdo nisme hetimore, parlamentare që është një mision kushtetues të opozitës”.
“Pas komisionit të inceneratorit, Edi Rama nuk lejon ngritjen e asnjë komisioni pasi çdo komision shkon tek ai dhe familjarët e tij. Prandaj opozita do të nisë aksionin e saj, në parlament dhe kudo për ti dhënë përgjigje Edi Ramës”, tha Berisha.
“Ju duhet të keni durim dhe të ndiqni në çdo seancë qëndrimet e opozitës. Ju garantoj se ato do të mbrojnë me të gjitha aspektet, interesat e qytetarëve opozitarë që nuk votuan këtë qeveri”, iu drejtua ai gazetarëve .
Berisha gjithashtu foli edhe për qëndrimet e Presidentit të Kroacisë, Zoran Milanoviç ndaj Kosovës.
Ai tha se, qëndrimet ndaj Kosovës të presidentit kroat dhe Edi Ramës janë si dita me natën.
“Ishte detyrim moral dhe i gjithanshëm, në respekt të Kroacisë një vend mik i vërtetë i Shqipërisë dhe të presidentit të saj, Milanoviç i cili me qëndrimet e tij në Organizatën e Kombeve të Bashkuara, por edhe pas OKB-së ka dëshmuar ndjenjat e tij më miqësore ndaj shqiptarëve, Kosovës, por edhe të shtetarit në respekt të ligjit dhe të drejtës ndërkombëtare”, u shpreh Berisha.
“Të krahasosh ato qëndrime me qëndrimet e Edi Ramës, i cili për dy apo tre ditë me radhë e shndërroi Tiranën nga kryeqytet evropian që duhej të ishte në kryeqytet, në gjysmën tjetër të Beogradit, apo të them në kryeqytet të megafonave të luftës së ftohtë kundër Kosovës dhe Prishtinës, konstaton një kontrast si nata me ditën”, nënvizoi.
“Ndaj dhe ne përshëndesim vizitën e presidentit Milanoviç dhe e garantojmë Kroacinë se për ne marrëdhëniet me këtë vend mik, anëtar të BE-së dhe NATO, janë një përparësi e padiskutueshme në marrëdhëniet tona në rajon dhe me gjerë”, u shpreh ai.
