Ka marrë fund arratia e 53 vjeçarit, Lorenc Kapllani alias Lorenc Sadikaj, i cili ishte shpallur në kërkim ndërkombëtar si pjesëtar i një grupi kriminal në fushën e trafikimit të lëndëve narkotike.
Kapllani është arrestuar nga policia e Vlorës, në lagjen “10 Korriku” me qëllim ekstradimin drejt Italisë, pasi Gjykata e Apelit të Catanias, Itali, e ka dënuar me 19 vjet e 6 muaj burgim, nga të cilat i kanë mbetur për të kryer 16 vjet, 6 muaj e 24 ditë, për veprat penale “Trafikimi i lëndëve narkotike” dhe “Organizata kriminale”, të parashikuara nga Kodi Penal i Italisë.
“Strukturat hetimore të Drejtorisë Vendore të Policisë Vlorë, në bashkëpunim me FAST Albania, zhvilluan dhe finalizuan operacionin policor të koduar “Midday”, në kuadër të të cilit u bë i mundur lokalizimi në lagjen “10 Korriku”, kapja dhe arrestimi i përkohshëm, me qëllim ekstradimin drejt Italisë, i shtetasit:
Lorenc Kapllani alias Lorenc Sadikaj, 53 vjeç, banues në Vlorë.
53-vjeçari ishte shpallur në kërkim ndërkombëtar pasi Gjykata e Apelit të Catanias, Itali, e ka dënuar me 19 vjet e 6 muaj burgim, nga të cilat i kanë mbetur për të kryer 16 vjet, 6 muaj e 24 ditë, për veprat penale “Trafikimi i lëndëve narkotike” dhe “Organizata kriminale”, të parashikuara nga Kodi Penal i Italisë.
Interpol Tirana, në bashkëpunim me Interpol Romën, vijon procedurat për ekstradimin e 53-vjeçarit drejt Italisë”,- njofton Policia.
Materialet procedurale iu referuan Prokurorisë, për veprime të mëtejshme.
