Fondi Monetar Ndërkombëtar, pret që Kosova të ketë rritje ekonomike prej 3.8 për qind për vitin 2023. Huadhënësi global ka njoftuar se ka rritur projeksionin nga prilli për 0.3 për qind.
Fondi Monetar Ndërkombëtar ka publikuar raportin e “Perspektivës Globale për Tetor 2023”, ku janë prezantuar projeksionet e fundit për rritjen ekonomike të Kosovës dhe zhvillimet e tjera ekonomike globale.
Në raportin e FMN-së për Perspektivën Globale të tetorit, theksohet se “rimëkëmbja globale mbetet e ngadaltë”.
Parashikimi bazë i raportit të fundvitit është që rritja globale të ngadalësohet nga 3.5 për qind në 2022 në 3.0 për qind në 2023 dhe 2.9 për qind në 2024.
Raporti i FMN-së gjithashtu parashikon rënien e rritjes globale në nivel botëror.
Sipas projeksioneve, rritja ekonomike botërore do të ngadalësohet nga 3,5 për qind në 2022 në 3 për qind këtë vit dhe 2,9 për qind vitin e ardhshëm, një rënie prej 0,1 pikë përqindjeje për vitin 2024 nga korriku.
Kjo tregon se ekonomia globale po përjeton sfida nga faktorë të ndryshëm, duke përfshirë pasojat e pandemisë dhe konfliktet në botë.
Ndërkaq, ekonomitë e zhvilluara pritet të ngadalësohen më tej. Projeksionet e FMN-së tregojnë një zvogëlim të rritjes ekonomike nga 2.6 për qind në vitin 2022 në 1.5 për qind në vitin 2023 dhe 1.4 për qind në vitin 2024.
Inflacioni pritet që të ngadalësohet për 4.7 për qind në 2023 nga 11.7 për qind nga viti paraprak, para se të bie në 3.1 për qind më 2024.
Nëse i kthehemi situatës së Kosovës, në raportin e FMN-së, për dallim nga raporti i prillit ku parashikohej rritje ekonomike prej 3.5 për qind, në raportin e tetorit kreditori global e ka rritur projeksionin në 3.8 për qind.
Projeksionet janë pozitive edhe për inflacionin, i cili pritet që të ngadalësohet për 4.7 për qind në 2023 nga 11.7 për qind nga viti 2022.
Kujtojmë se viteve të fundit Kosova është përballur me një sërë sfidash në fushën e zhvillimit ekonomik. Ndikuar edhe nga situata post-pandemike e lufta në Ukrainë, Kosova, ndër vendet më deficitin më të madh tregtar e një ekonomi të euroizuar, iu ekspozua ndjeshëm krizës globale.
Me gjithë sfidat e shumta me inflacionin, stagnimin drastik të rritjes reale ekonomike gjatë vitit të kaluar, realizimin e ulët të investimeve kapitale dhe rëndimin e deficitit tregtar, “rritja ekonomike e Kosovës” ishte një nga “argumentet” e përdorura më së shpeshti nga qeveria Kurti.
Në tremujorin e dytë të vitit 2022, rritja ekonomike e Kosovës u frenua në 2.1 për qind, duke shënuar nivelin më të ulët të rritjes që nga viti 2014 nëse përjashtojmë vitin 2020, kur ekonomitë botërore po përjetonin goditjen e një pandemie që iu shkaktoi shumë shteteve një kolaps të përkohshëm.
Sfidat e mëdha në tregun punës, të karakterizuara me një shkallë të lartë të papunësisë, ekonomi joformale të konsiderueshme dhe pabarazi në politikat dhe praktikat e punës, janë disa nga sfidat e tjera me të cilat vendi vazhdon të përballet sipas raporteve ndërkombëtare, në veçanti ai i Departamentit të Shtetit për “Klimën e Investimeve”./Monitor
