Çmontimi i grupit të Gëzim Çelaj i konsideruar si “Baroni i drogës”, e ka zanafillën qysh në muajin Prill 2023, ku në zonën afër aeroportit të Rinasit, është kapur Armando Papa.
Ndalimi i këtij të fundit është realizuar nga strukturat operacionale në Policinë e Shtetit, ndërsa policia i gjeti në bagazh një sasi prej 42 kg heroinë.
Armando Papa, besohet se është korrieri i Gëzim Çelaj nga Fushë-Kuqa dhe Arben Dalipit nga zona e Vlorës, tashmë të dy të shpallur në kërkim nga SPAK.
Teksa ka dalë parë gjyqtarëve të Tiranës për tu njohur me masën e sigurisë “arrest në burg”, Papa pretendoi se nuk kishte dijeni për lëndën narkotike dhe se dikush tjetër duhet ta ketë vendosur atë në makinë.
31-vjeçari pohoi gjithashtu se ishte nisur drejt Rinasit, për t’i dërguar një porosi motrës së tij.
Vlera e heroinës në treg llogaritet në gjysmë milioni euro. Por hetimet e këtij rasti i ka ndjekur prokuroria e Posaccme SPAK, e cila zbuloi se në këtë linjë të trafikut të drogës, ishte i përfshirë Gëzim Çelaj dhe vlonjati Arben Dalipaj.
Në muajin Gusht 2023, SPAK dhe policia ndërhynë gjatë një operacioni në det, duke parandaluar një rast të trafikut të heroinës, kokainës dhe hashashit drejt Italisë.
Gjatë operacioni “Flakë në det”, u arrestua ish-shefi i krimeve të Tropojës, Arlind Ismailukaj, Armando Mema, Nerim Çela, nipi i Gëzim Çelës, Besnik Brokeri, dhe dy ukrainasit Kyrylo Ponomarenko, Kostiantyn Biellon.
Ndërsa u shpallën në kërkim Arben Dalipaj me pseudonimin “Kapelja” dhe Gëzim Çela.
Ndërkohë ditën e djeshme në një dalje publike para mediave, drejtori i policisë së Shtetit, Muhamet Rrumbullaku, njoftoi se policia kishte shpallur në kërkim Gëzim Çela, Arben Dalipajn nga Vlora, si dhe Roland Guzo nga Durrësi, ndërsa ishte arrestuar shefi i komisariatit të Kurbinit, Dritan Meta, si person që kishte marrë pjesë në këtë grup kriminal.
