Dhjetëra qytetarë kanë nisur një marshim pasditen e sotme në solidarizim me rastin e rëndë ku një 3-vjeçar humbi jetën pas një operacioni në klinikën në pronësi të mjekut Roland Xhaxho dhe vajzës së tij Ina Xhaxho.
Qytetarët kanë shoqëruar marshimin e tyre me pankarta ku shkruhen mesazhe të ndryshme, mes të cilave edhe: “Bluzat e bardha duhet të shpëtojnë jetë, jo të marrin”.
Qytetarët bëjnë thirrje për drejtësi dhe zbardhjen e së vërtetës që po fshihet pas kësaj ngjarjeje. Ata kanë ndezur edhe qirinj në nder të të miturit që humbi jetën tragjikisht.
Tubimi është zhvilluar në rrugën Frederik Shiroka, pranë 21 dhjetorit, pranë klinikës së anestezistit.
Prindërit e kanë pasur të pamundur për të folur, por përmes avokatit fajësuan mjekimin e gabuar. Deklaratën e klinikës ku thuhej se gjithçka shkoi në rregull, avokati e cilësoi të pavërtetë.
Një tjetër stomatolog shprehet se të miturit iu dëmtuan organet. Për ngjarjen, ai kërkon që të merren masa ndaj mjekëve.
Kujtojmë se pas hetimeve mjekët ligjore deklaruan shkaqe të panjohura për vdekjen, ndërsa anestezisti dhe mjekët që bënë ndërhyrjen po ndiqen në gjendje të lirë.
Skeda e vdekjes mban firmën e ekspertit mjeko-ligjor Erindo Alla. Shkaku paraprak është përcaktuar më datë 1 tetor, ditën kur vogëlushi 3-vjeçar humbi jetën. Por, pritet edhe një raport përfundimtar për shkakun e vdekjes.
Detaje nga ngjarja e rëndë
I mituri është dërguar nga familjarët në një klinikë dentare për disa shërbime. Pasi mjeku, Roland Xhaxho i ka bërë grafinë, u ka thënë prindërve se fëmija ka 13 apo 14 dhëmbë për rregullim.
Për shkak të numrit të lartë është vendosur që të kryhet operimi me narkozë. Pas një operacioni që zgjati shumë orë, djali nuk është zgjuar më dhe është dërguar në shtëpi, sepse mjeku iu ka thënë familjarëve se do të zgjohet më vonë.
Në shtëpi, vogelushi ka shfaqur probleme dhe rritje temperature dhe është dërguar në pediatri ku ka qëndruar në gjendje kome për 2 ditë dhe ka ndërruar jetë.
Daja i 3-vjeçarit tha se mjeket bënë ta pamundurën për ta shpëtuar por ishte vonë pasi i ishte helmuar mëlçia. Ai ka thënë se vrasësit janë Roland dhe Ina Xhaxho, dhe se do të bëjnë të pamundurën që ata të mos e kalojnë kaq lehtë. Gjithashtu ata kanë akuzuar dentistin për manipulim të ngjarjes.
