Tirana dhe Partizani kanë shënuar fitore në javën e katërt të Superligës së volejbollit për meshkuj.
Ndeshja më interesante ishte derbi ndërmjet Tiranës dhe Studentit, me bardheblutë që fituan me përmbysje pas një beteje të vërtetë në “Farie Hoti”, takim që zgjati 2 orë e 14 minuta.
Një paraqitje për duartrokitje për Studentin, që e nisi në mënyrë fantastike duke fituar dy setet e para 21-25 dhe 17-25, për t’iu afruar shumë suksesit final edhe në setin e tretë.
Por kampionët në fuqi, reaguan mjaft mirë, teksa pas pikëve shtesë e fituan setin e tretë 27-25, duke kompletuar më pas përmbysjen me dy setet e radhës 25- 21 dhe 15-12.
Ledion Martiro me 29 pikë, edhe një herë tjetër ishte kyç në suksesin e skuadrës së Arben Sakos. Ndërsa për ekipin Studentor nuk mjaftoi paraqitja fantastike e brazilianit Da Silva, protagonist me 31 pikë.
“Demat” e trajnerit Ylli Tomorri siguruan suksesin e katërt në kampionat, duke kaluar me sukses transfertën ndaj Vllaznisë. Partizani doli fitues me rezultatin 1-3 (20-25, 25-21, 15-25, 18-25) në një takim që zgjati 1 orë e 48 minuta.
Me gjithë përpjekjet e kuqebluve, të cilët barazuan përkohësisht shifrat e seteve, duke fituar fraksionin e dytë, organizimi dhe kualiteti më i lartë i miqve bëri diferencën.
Njeriu i ndeshjes ishte braziliani Cardoso Almeida, autor i 21 pikëve. Për Partizanin spikatën gjithashtu edhe Qepa me 15 pikë, Soares me 14 si dhe talenti Raul Sabliqi, autor i 11 pikëve. Për Vllazninë shënuesi më i mirë ishte afrimi më i fundit, kanadezi Andrew Dube me 12 pikë.
