Gjykata e Durrësit ka vendosur masën “Arrest në burg” për Aldi Mustafën dhe Klevis Turdiun, dy të rinjtë që u kapën me armë zjarri pa leje dhe që dyshohet se ishin nisur për të vrarë dikë.
Mustafa dhe Turdiu, rezultojnë të dënuar më herët për vepra të ndryshme penale. Ata u arrestuan mbrëmjen e 30 shtatorit në zonën e ish-Kënetës, dhe gjatë kontrollit në makinë ju gjetën 3 pistoleta me fishekë në fole dhe 1 mitraloz me fishekë në fole, gati për qitje, municion luftarak, vlera monetare dhe sende të tjera.
Dyshohet se do kryenin një vrasje, kundrejt pagesës.
Po kush është Aldi Mustafa:
Aldi Mustafa, 35 vjeç, banues në Durrës, i dënuar më parë për veprat penale “Kanosja” dhe “Prodhimi dhe shitja e narkotikëve”, i dënuar më parë me 10 vite burg, në Gjermani, nuk është një emër i panjohur për policinë.
Mësohet se Mustafa më herët ka qenë anëtar i një bande të njohur në Durrës, ndërsa kohët e fundit ka pasur lidhje me ‘Rrumin’, një personazh i njohur dhe i përfolur në ngjarje kriminale, siç ishte dhe atentati ndaj ish-prokurorit Arjan Ndoja.
Sipas Bezatit, Mustafa është shok i Alekasandër Lahos, ose ndryshe Pëllumb Muharremit, i njohur si i ‘Forti i Shijakut’, i cili i shpëtoi atentatit që iu bë makinës së ish-prokurorit.
