Gazetari Gjergj Zefi, administrator i portalit “Pamfleti,” është dhunuar këtë të martë në Tiranë.
Policia njoftoi se nga një telefonatë në Sallën Operative është marrë njoftim se në rrugën “Bardhok Biba”, persona të paidentifikuar kanë goditur me sende të forta një shtetas. Pas verifikimeve të kryera, shtuan të njëjtat burime, “ka rezultuar se personi i dëmtuar është shtetasi GJ.Z., 52 vjeç (administrator i një portali), i cili aktualisht po merr ndihmën mjekësore”. Me marrjen e njoftimit, është ngritur grupi Hetimor dhe nën drejtimin e Prokurorisë vijon puna për sqarimin e rrethanave të ngjarjes, identifikimin dhe kapjen e autorëve, mbyllet njoftimi i bluve.
Vetë portali, në një rarpotim lidhur me ngjarjen, lë të kuptohet se ka lidhje me detyrën e Gjergj Zefit.
“Editori i ‘Pamfletit’, Gjergj Zefi ka rënë sot pre e një sulmi fizik. Persona që e urrejnë fjalën e lirë dhe që nuk e kapërdijnë dot realitetin që shkruan portali, me një akt prej burracakësh, sulmuan pas shpine gazetarin Zefi, pasi ai po dilte nga zyrat e portalit. Policia mbërriti në vendin e ngjarjes dhe falë hetimeve të saj u arrit të identifikohet se Zefit ju bë pritë nga një automjet me xhama të zinj që rezulton në pronësi të shtetasit Renato Bodurri, nga Elbasani. Policia po verifikon nëse ka qenë ai vetë apo jo i përfshirë”, thuhet në raportim.
“Sulmi ndaj një gazetari është akt i pafalshëm për këdo. Fjala e lirë nuk mund të cenohet. Gazetarët në të gjithë botën janë të paprekëshëm. ‘Pamfleti’ gjithmonë e ka thënë realitetin ashtu siç është pavarësisht se shumë personave nuk u pëlqen. Sulme të tilla vetëm na bëjnë më të fortë dhe na japin kurajo për të tregur të vërtetën ashtu siç është, pa shtrembërime dhe me fakte”, thuhet më tej në artikull.
