Prokuroria e Përgjithshme i ka kthyer përgjigje Komisionit Qendror të Zgjedhjeve për kryebashkiakun e Divjakës, Fredi Kokoneshin dhe për kryebashkiakun e Mallakastrës, Qerim Ismailajn, të dy të denoncuar nga Partia Demokratike si persona që preken nga ligji për dekriminalizimin.
Në përgjigje, prokuroria bën me dije se as Kokoneshi dhe as ai Ismailaj nuk përfshihet në fushën e veprimit të nenit 2 të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Kujtojmë se në denoncimin e PD për Fredi Kokoneshin thuhej: “Subjekti Fredi Kokoneshi, ka qenë në qytetin ë Milanos gjate viteve 1991-1997. Gjate këtij qëndrimi rezulton se është përfshirë edhe në një konflikt me shtetasin Fatos Korreshi dhe kushëriri i vet Landi Kokoneshi, të cilët kanë dijeni edhe për veprimtarinë e tij kriminale. Për shkak të këtij konllikti, subjekti Fredi Kokoneshi, ka qenë edhe në gjendje kome për rreth 20 ditë, në Magenta, një provincë pranë qytetit të Milanos. Gjithashtu, dijeni për këto fakte kane edhe shtetasit Shpëtim Bode nga Lushnja dhe Artan Mullai nga Divjaka. Denoncimi për veprimtarinë kriminalë të subjektit Fredi Kokoneshi, është bërë edhe nga ish-sekretari i Partisë Socialiste në zonën e Divjakës z. Berti Mone, që aktualisht ndodhet në France, ku ka fituar edhe azil. Konkretisht, z. Mone ka akuzuar subjektin Kokoneshi se në vitet 1995 — 1996, ka kryer trafik të qenieve njerëzore dhe veprimtari te paligjshme të lidhura me prostitucionin në Milano. Për pasojë, ai ka qenë i arrestuar nga Policia italiane dhe i dënuar me burg. Sipas dëshmisë se z.Mone, këto të dhëna i janë bërë më dije në vitin 2012 edhe Drejtorisë së Shërbimit Informativ Lushnje”
Ndërsa, kryebashkiaku Qerim Ismailaj është dënuar me 6 muaj burgim nga GJJKO, duke u shpallur fajtor për kryerjen e veprës penale “Falsifikimi i vulave, i stampave ose i formularëve”, pasi kishte fshehur në formularin e dekriminalizimit dënimin e tij në Greqi
Përgjigjet e Prokurorisë:
Sektori i Dekriminalizimit pranë Prokurorisë së Përgjithshme, ka dërguar në Komisionin Qendror të Zgjedhjeve, vendimin Subjekti vetëdeklarues Fredi Pandi Kokoneshi, me detyrë, kryetar i Bashkisë Divjakë, nuk përfshihet në fushën e veprimit të nenit 2 të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”.
Deklarues, Z. Qerim Ismail Ismailaj, Kryetar i Bashkisë Mallakastër, Qarku Fier, i propozuar nga subjekti zgjedhor Partia Socialiste, për zgjedhjet për organet e qeverisjes vendore të datës 14 Maj 2023, nuk përfshihet në fushën e veprimit të nenit 2 të ligjit 138/2015, “Për garantimin e integritetit të personave që zgjidhen, emërohen ose ushtrojnë funksione publike”.
