Jordi Jaku është larguar papritur nga Dinamo dhe ka nënshkruar për klubin tjetër kryeqytetas, Tiranën.
Mesfushori 17-vjeçar, më parë pjesë e Kombëtares U-17 dhe tani e U-19-ës, këtë sezon nuk ka pasur hapësirë në ekipin e parë të Dinamos dhe kjo është arsyeja e largimit të tij.
Ai është konsideruar si një nga të rinjtë më premtues dhe prirej që në një të ardhme të afërt të sillte të ardhura në arkën e klubit blu, duke u shitur në një kampionat të huaj, por këto të ardhura në vazhdim mund t’i përfitojë Tirana.
Gazeta mëson se lojtari i lindur në Rrëshen ka firmosur për 3 vjet me bardheblutë.
Sezonin e kaluar Jaku luajti disa ndeshje me Dinamon në Kategorinë e Parë. Këtë sezon, me ndryshimet e bëra dhe ardhjen e trajnerit Luixhi Di Biaxho në stol, mesfushori nuk ka marrë hapësirën që kërkonte, duke kaluar tek U-19. Mbrëmjen e së dielës palët janë ndarë me mirëkuptim, duke i hapur rrugën kalimit të Jakut te Tirana.
