Biznesmeni i ndërtimit Aleksandër Gavoçi u tentua të mashtrohej nga grupi i goditur nga policia e Tiranës me 4 persona të arrestuar dhe dy në kërkim.
Emri i Gavoçit u lakuar tre vite më parë, ndërsa atij iu bllokua nga autoritetet një shumë e konsiderueshme monetare. Po ashtu, ai është vëllai i Ilir Gavoçit, i dyshuar për masakrën e ndodhur në vitin 2005 në Tiranë, ku u ekzekutuan katër vetë në një lokal.
4 në pranga dhe 2 në kërkim
Katër personat e arrestuar nga policia me akuzën se tentuan ti merrnin 70 mijë biznesmenit përmes mashtrimit, janë Xhonatan Xhaferri, 24 vjeç, Leonard Xhika, 39 vjeç, Mikel Panxhi, 30 vjeç, të tre banues në Elbasan, dhe Petro Ferzaj, 51 vjeç, banues në Vlorë.
Gjithashtu, u shpallën në kërkim Xhensil Qefa, 27 vjeç, banues në Elbasan, dhe Florian Gjergji, 40 vjeç, banues në Shkodër. Florian Gjergji është në kërkim edhe për disa raste të tjera të ngjashme.
Këta persona “kanë tentuar të mashtrojnë një shtetas (biznesmen), për të përfituar shumën 70 000 euro, duke u prezantuar si përfaqësues të një zyrtari shtetëror”, njoftoi policia këtë të premte. Biznesmeni që u tentua të mashtrohej është Aleksandër Gavoçi, thanë burime policore, ndërsa për të vënë në jetë skemën është përdorur emri i kryebashkiakut të Tiranës Erion Veliaj. Kryebashkiaku i Tiranës, i kanë thënë mashtruesit biznesmenit, është personi që do i jepej shuma prej 70 mijë eurove që i është kërkuar Aleksandër Gavoçit.
Kjo herë e dytë që është përdorur emri i kryetarit të bashkisë së Tiranës Erion Veliaj në tentativa mashtrime nga grupe ku bënte pjesë Florian Gjergji.
Florian Gjergji në kërkim për raste të ngjashme
Emri i Florian Gjergjit del në të paktën 4 raste të tjera të ngjashme, ku ai akuzohet nga autoritetet si pjesë e grupeve që kanë tentuat të mashtrojnë biznesmenë. Një në rastin ku tentua që ti merrej 130 mijë euro biznesmenit Pëllumb Salillari. Një më 17 maj 2023 kur u përmend emri i kryebashkiakut Erion Veliaj me qëllim që përmes mashtrimit t’i merrnin një biznesmenit Ramë Gecit, një shumë të konsiderueshme monetare. Po ashtu një rast tjetër është kur mashtruesit kanë përdorur emrin e ish-kreut të Kadastrës, Artan Lame për t’iu marrë para biznesmenëve. Skema e fundit e mashtrimit iu tentua ti bëhej më 4 gusht 2023 pronarit te ‘Brunes’ Geront Çela. Këtë herë emri që është përdorur si ‘dërgues’ ka qenë i kryetarit të bashkisë Vlorë, Ermal Dredha. Policia arriti ti zbulonte bashkëpunëtorët në momentin kur ishte organizuar dorëzimi i shumës prej 35 mijë euro.
Florian Gjergji dyshohet se të gjithë aktivitetin e mashtrimit e kryen nga Gjermania.
