Janë arrestuar dy autorët e ngjarjes që ndodhi mbrëmjen e kaluar në fshatin Demiraj, të Malësisë së Madhe.
Në pranga kanë rënë shtetasit, I. B., 59 vjeç dhe S. B., 18 vjeç (babë e bir), pasi pas një konflikti të çastit kanë plagosur me armë zjarri shtetasin Emanuel Guri, 28 vjeç.
Ky i fundit ndodhet në spital, jashtë rrezikut për jetën.
“Shërbimet e Komiariatit të Policisë Malësi e Madhe, në vijim të veprimeve hetimore për zbardhjen e rrethanave të konfliktit të ndodhur mbrëmjen e djeshme, në fshatin Demiraj, arrestuan në flagrancë shtetasit I. B., 59 vjeç dhe S. B., 18 vjeç (babë e bir), banues në fshatin Demiraj, Malësi e Madhe.
Nga veprimet hetimore dyshohet se këta shtetas, gjatë konfliktit për motive të dobëta, kanë plagosur me armë zjarri pistoletë, shtetasin E. G., 28 vjeç, banues në fshatin Demiraj, Malësi e Madhe, i cili ndodhet në spital, jashtë rrezikut për jetën”,- njofton Policia.
Materialet procedurale do t’i kalojnë Prokurorisë, për veprime të mëtejshme.
