Më shumë se 10 persona janë marrë në pyetje nga policia lidhur me vrasjen e Martin Bardhit, mëngjesin e së martës në qendër të Rrëshenit. Burime nga grupi hetimor bëjnë me dije se mes tyre ka dhe persona që kanë qenë në konflikt me viktimën në të shkuarën, por që përpara hetuesve kanë mohuar përfshirjen në ngjarje.
Mes dëshmive të administruara janë dhe të qytetarëve të rastit që në momentin e vrasjes u gjendën në lokalin që ndodhet përballë komisariatit të policisë. Mësohet se ata kanë deklaruar që nuk kanë arritur të shquajnë autorët dhe se sapo kanë dëgjuar të shtënat e armëve janë shtrirë menjëherë në tokë.
Kamerat e sigurisë në zonë konsiderohen me tepër vlerë për policinë dhe prokurorinë e Lezhës, të cilat po i analizojnë pamjet filmike për të kuptuar lëvizjen e autorëve para dhe pas krimit.
3 autorët që dyshohet se morën pjesë në vrasjen e 59-vjeçarit Martin Bardhi i njohur dhe me mbiemrin Marku ka dyshime të jenë ndihmuar nga një person tjetër që i priste në fshatin Gëziq të Rrëshenit. Aty ata dogjën makinën pa targa të përdorur në krim që nga verifikimet rezultoi e vjedhur.
Në mars të këtij viti Martin Bardhi dhe djali i tij dyshohet se qëlluan me armë Saimir Reçin pas një konflkti fizik. 59 vjeçari doli nga burgu pasi dëshmoi se në kohën që ndodhi krimi, kishte qenë në një vend tjetër. Për këtë ngjarje vijon të jetë në kërkim djali i tij.
Përplasja mes dy fiseve ka nisur që në vitin 1994 kur është vrarë Ilir Reçi. Për këtë krim akuzohet një nga anëtarët e fisit Bardhi. Pavarësisht se drejtori i policisë së Lezhës sqaroi se Martin Bardhi kishte problem me disa fise në Rrëshen, Klan News mëson se një tjetër pistë hetimi është dhe aktiviteti jashtë shtetit, i djalit të tij. Dyshohet se i riu është i përfshirë në trafikun e drogës.
