Një 50-vjeçar është arrestuar këtë të mërkurë nga policia në Fier, pasi akuzohet për posedim të lëndëve narkotike.
Në pranga ka rënë shtetasi Zamir Malaj, pasi gjatë kontrollit të policisë i janë gjetur 3100 fara kanabisi dhe kishte si qëllim kultivimin dhe shitjen e tyre.
Ai do ta mbillte farën në tokën e tij. Gjithashtu policia ka hapur një procedim në gjendje të lirë edhe për nipin e 50-vjeçarit, Ronaldo Malaj, 24 vjeç. Ky i fundit kundërshtoi forcat e policisë gjatë arrestimit të xhaxhait të tij.
Arrestimi u krye në kuadër të operacionit policor të koduar “Implikimi” në fshatin Kreshpan në Fier.
“Është organizuar dhe finalizuar operacioni policor i koduar “Implikimi”, në kuadër të të cilit janë ushtruar kontrolle në këtë banesë, në pronësi të shtetasit Z. M., në fshatin Kreshpan. Nga kontrollet u gjetën dhe u sekuestruan 3100 fara të dyshuara narkotike cannabis sativa. Në vijim, u gjetën dhe u asgjësuan nëpërmjet djegies, 6 bimë të dyshuara narkotike cannabis sativa, të cilat shtetasi Z. M. i kishte kultivuar në mes të tokës së tij të mbjellë me pemë frutorë, me qëllim fshehjen e tyre.
Në vijim të veprimeve procedurale për këtë rast u kap në flagrancë dhe u arrestua shtetasi Z. M., 50 vjeç, për veprat penale “Prodhimi dhe shitja e narkotikëve” dhe “Kultivimi i bimëve narkotike”.
Gjithashtu, u referuan materialet në Prokurori ku nisi procedimi në gjendje të lirë për shtetasin R. M., 24 vjeç (nipi i shtetasit Z. M.), pasi ka kundërshtuar punonjësit e Policisë, teksa kryenin veprimet procedurale për arrestimin e 50-vjeçarit”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
