Empoli gjen fitoren e parë sezonale dhe e bën këtë me golin e parë të shënuar për këtë edicion, pikërisht në javën e 6 ndaj Salernitanës. Ishte Baldanzi që vendosi ndeshjen ndaj Salernitanës, me një gol në pjesën e parë, teksa Empoli i dha fund hemorragjisë prej 5 humbjesh radhazi, duke gjetur suksesin e parë.
Trajneri Andreazzoli i besoi sërish nga minuta e parë sulmuesit të talentuar shqiptar, Stiven Shpendi, i cili nuk zhgënjeu, duke dhuruar një tjetër paraqitje mjaft të mirë në fushë.
Shpendi qëndroi në fushë për 72 minuta, duke shënuar edhe një gol, por festa iu prish nga arbitri që sinjalizoi pozicion jashtë loje, ndërsa më pas pa që portieri Ochoa t’i mohonte dy herë golin e parë në Serinë A.
Titullar edhe gardiani kuqezi Etrit Berisha, i cili bëri gjithashtu në mënyrë perfekte detyrën e tij në portë, duke u mohuar golin miqve, ndërsa Ardjan Ismajli qëndroi jashtë për shkak të një dëmtimi të pësuar ndaj Interit të dielën.
Mori fitoren e dytë radhazi edhe Atalanta, që ia doli të triumfojë me rezultatin minimal 0-1 në transfertën e vështirë ndaj Veronës. Për bergamaskët vendosi mesfushorin holandez Teun Koopmeiners në minutën e 13’, ndërsa Atalanta ngjitet në vendin e katërt me 12 pikë.
