Një 45-vjeçar është arrestuar këtë të mërkurë në Korçë, pasi është kapur në flagrancë duke transportuar kanabis me destinacion Greqinë.
Në pranga ka rënë shtetasi Klodian Kllomollari pasi kontrollit të ushtruar në automjetin e tij tip “Benz”, u gjetën 2 qese me 52.6 kg lëndë të dyshuar narkotike kanabis, që do ta trafikonte, në drejtim të Maqedonisë së Veriut, me destinacion final shtetin grek, kundrejt fitimit 500 euro/kg.
“U bë kapja dhe arrestimi në flagrancë i shtetasit:
– Klodian Kllomollari, 45 vjeç, banues në fshatin Vërdovë, Pogradec.
Në bazë të informacioneve të siguruara nga inteligjenca informative se shtetasi i mësipërm do të trafikonte me automjetin e tij një sasi droge, forcat e Policisë organizuan punën dhe bënë lokalizimin e 45-vjeçarit në fshatin Vërdovë. Gjatë kontrollit të ushtruar në automjetin e tij tip “Benz”, të cilin e kishte parkuar në oborrin e banesës, u gjetën 2 qese me 52.6 kg lëndë të dyshuar narkotike kanabis në total.
Nga veprimet hetimore rezultoi se 45-vjeçari e kishte siguruar lëndën narkotike nga shtetas të tjerë dhe më pas do ta trafikonte me automjetin e tij, në drejtim të Maqedonisë së Veriut, me destinacion final shtetin grek, kundrejt fitimit 500 euro/kg”,- njofton Policia.
Në cilësinë e provës materiale u sekuestruan lënda narkotike, automjeti dhe një aparat celular.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
