Ndërkohë që prej 18 shtatorit ka nisur në vendin tonë procesi i regjistrimit të popullsisë dhe banesave, kreu i PBDNJ-së, Vangjel Dule, ka ngritur disa shqetësime në lidhje me zhvillimin e këtij procesi. Nga Kryesia e Kuvendit, ai tha se ka pasur shkelje flagrante gjatë regjistrimit dhe solli rastin e kreut të organizatës OMONIA.
“Prej datës 18 shtator, ka filluar censi 2023. Me shqetësim, po ju prezantojmë gjetjet e aktivistëve të PBDNJ-së. Ka shumë raste që regjistruesit në kundërshtim me ligjin, nuk e kryejnë regjistrimin në tabletat përkatëse, por mbajnë shënime se do t’i hedhin më vonë, shkelje e rëndë e procedurës. Nuk lihet njoftim me shkrim në ato banesa kur nuk gjendet një qytetar, por edhe më keq, kemi raste të denoncuara kur nuk u drejtohen pyetjet mbi përkatësinë etnike, gjuhën dhe besimin fetar. Kur qytetarët duan ata u thonë që është fakultative. Fakultative është përgjigjja e qytetarit, pyetja është detyruese. Në shtëpinë e drejtuesit më të lartë të organizatës OMONIA, regjistruesi po plotësonte dokumentacionin e kryefamiljarit dhe regjistronte të gjithë pjesëtarët e familjes, regjistruesi mohonte të regjistronte pjesëtarët e familjes se nuk është këtu, ndërkohë që ligji i jep të drejtë të regjistrojë pjesëtarët e familjes dhe të deklarojë vendndodhjen e tyre. Kemi të bëjmë me shkelje.”
Ai u bëri thirrje minoriteve etnike dhe fetare që të deklarojnë gjuhën amtare dhe besimin fetar, ndërsa INSTAT-it i kërkoi që të ndërhyjë për të mos e shndërruar në farsë këtë proces.
“Është për të ardhur keq që edhe zyrtarë të lartë shtetërorë dhe nëpunës të administratës ngrenë shqetësime të tilla që vihen në kundërvënie të hapur me frymën europiane. Ju drejtohem të gjithë qytetarëve dhe minoriteteve e komuniteteve fetare në vend të deklarojnë nëse është vullneti i tyre gjuhën amtare dhe besimin fetar. Është një instrument i pazëvendësueshëm për shtetin e qeverinë për të ushtruar politika me standarde bashkëkohore. E shtrij këtë thirrje tek INSTAT që të ndërhyjë te regjistruesit e të shpëtojë procesin nga shndërrimi i tij nën farsë e parodi. I bëj thirrje BE-së ta ndjekë këtë proces dhe të shmangë çdo aspekt negativ që të mos jetë edhe ky cens i dështuar sa i përket minoriteteve etnike dhe fetare në vend.”
Ai tha se për çdo denoncim të bërë në media ka fakte mbi emra vendbanimesh dhe bashki ku ka ndodhur.
Dule kërkoi gjithashtu “regjistrim të drejtë e të saktë të minoriteteve etnike në vend si instrumentin bashkëkohor të gjithëpranuar në të gjithë botën e civilizuar që çon në zbatimin e politikave adekuate të minoriteteve etnike konform konventës së Këshillit të Europës”.
Dule për Belerin: Do ta drejtojë bashkinë deri në 2027
Dule foli dhe për çështjen e kryebashkiakut të zgjedhur të Himarës, Fredi Beleri i cili ndodhet pas hekurave për korrupsion zgjedhor.
Teksa u pyet nga gazetarët për afatet ligjore për të bërë betimin, Dule theksoi se nuk ka asnjë dispozitë ligjore që e çon procedurën në përfundim mandati dhe sipas tij Beleri do ta drejtojë bashkinë deri në 2027.
“Do ju thosha që nuk ka asnjë afat ligjor që e kufizon z.Beleri të kryejë betimin që nga momenti që ka shprehur dëshirën, që në momentin e parë për t’iu përgjigjur ligjit dhe Kushtetutës. Për rrjedhojë që nga momenti që z.Beleri për asnjë çast nuk ka refuzuar që të bëjë betimin, nuk ka asnjë dispozitë ligjore që e çon procedurën në përfundim mandati. Z. Beleri është kryetari i zgjedhur i Bashkisë dhe si i tillë do ta drejtojë atë dhe mandati i tij përfundon si i gjithë kryebashkiakëve të tjerë në vitin 2027”, deklaroi Dule.
