Diplomati Flamur Gashi e shikon ngjarjen e rëndë dje në Kosovë si një akt terrorist të zhvilluar nga ana e Serbisë brenda territorit të Republikës së Kosovës nga forca të specializuara të ushtrisë dhe të policisë serbe. Gashi tha në studion e emisionit “Të Paekspozuarit” se rasti i djeshëm ka qenë i planifikuar gjatë që të bëhej masakër ndaj njerëzve që ishin në kishë dhe në verifikim janë 20 priftërinj.
“Ky është një akt terrorist i zhvilluar nga ana e Serbisë brenda territorit të Republikës së Kosovës nga forca të specializuara të ushtrisë dhe të policisë serbe. Këto janë të faktuara në bazë të armatimit të gjetur, përgatitjes fizike dhe veprimeve taktike. Por veprimet u kanë dalë jashtë kontrollit, sepse kanë vendosur dy maune në një urë në hyrje të fshatit. Patrulla e policisë së Zveçanit që udhëhiqej nga polici i vrarë, sapo ka hasur, është përballur me zjarrin e trupave serbe aty dhe kështu që operacioni i tyre është përshpejtuar. Kemi të njëjtin rast të përsëritur në Pejë, gjatë luftës në vitin 1988, që quhet rasti “Panda”, kur terroristët serbë kanë vrarë 16 shtetas serbë dhe më pas u bë masakër në Pejë, duke arrestuar njerëz dhe duke i përndjekur, duke thënë se këtë e bënë shqiptarët. Këtë e ka pranuar vetë z. Vuçiç para 4 viteve kur tha se rasti “Panda” në Pejë është organizuar nga serbët.
Rasti i djeshëm ka qenë i planifikuar gjatë që të bëhej masakër ndaj njerëzve që ishin në kishë. Sot janë në verifikim 20 priftërinj. Çfarë kërkonin ata, a janë vërtetë priftërinj, sepse, sipas informacioneve, janë 49 pjesëmarrës në këtë ngjarje.
Aty, nën rrethim nuk ka patur civilë, edhe shtëpisë rreth manastirit, nuk ka patur civilë serbë, por vetëm forca terroriste serbe dhe ideja ishte që të bëhej masakër brenda kishës.”-tha Gashi.
