Ernest Muçi është kryefjalë për momentin me talentin shqiptar që po kalon një formë fantastike me Legian në Poloni.
Ish-sulmuesi i Tiranës, ka folur në një intervistë për Supersport ku ka prekur tema të ndryshme si Kombëtarja, Legia, e ardhmja si dhe ish-klubi i tij Tirana.
Triumfi ndaj Aston Villa-s- “Jam shumë i lumtur që arritëm një fitore shumë të madhe për klubin tonë, ishte ndeshje e parë në Conference League. Kënaqësi edhe për tifozët që mbushin stadiumin, ishte një ndeshje shumë e bukur. I lumtur që ndihmova ekipin me dy gola dhe këtë fitore do ta mbaj mend gjithmonë.
Legia është një klub i madh dhe kërkon një nivel të caktuar, në këtë moment ndihem shumë mirë. Ekipi është më i mirë se në sezonet e klauar dhe shpresoj të dalim kampionë”.
Merkato- “Këtë nuk e di, ajo është në dorë të klubit. Unë duhet të jem i fokusuar te fusha dhe tek ndeshjet që kemi. Kemi shumë ndeshje të rëndësishme dhe deri në fundin e dhjetorit luajmë çdo tre ditë. Për mua e rëndësishme është të jap më të mirën dhe të marrim rezultate sa më të mira. Pastaj merkato, në dimër apo në verë është në dorë të klubit.
Pesë ligat më të forta janë ato që synon çdo lojtar, kështu një nga ato do të ishte një arritje e madhe. Shpresoj një ditë të luaj aty, ajo është ëndrra, por duhet të punoj akoma më shumë dhe të jap më shumë që të arrij atje. Spanja, LaLiga është një kampionat i fortë, besoj edhe Serie A”.
Kombëtarja- “Të jesh pjesë e kombëtares është një nder, edhe nëse nuk luaj sërish në stërvitje duhet të jem gjithmonë i karikuar që të jap më të mirën kur të më jepet shansi dhe të ndihmoj vendin tim. Për kombëtaren gjithnjë duhet të jesh gati dhe të japësh më të mirën”.
Tirana- “Më merr malli sepse aty kam kaluar të gjithë fëmijërinë time, edhe për ekipin normal se aty jam rritur që nga moshat. Kam kaluar vite të bukura dhe është normale që më merr malli. Tirana ka një ekip shumë të fortë, i kam ndjekur edhe në ndeshjet e Europës. Besoj do të bëjnë mirë dhe do të arrijnë ta fitojnë kampionatin. Derbi besoj do të jetë një ndeshje shumë e luftuar si të gjithë derbit, por shpresoj që Tirana të marrë rezultat të mirë dhe të fitoj ndeshjen”.
Goli më i bukur në derbi? “Për golin më të bukur besoj ka qenë ai që kam shënuar nga goditja e dënimit, pastaj më i rëndësishmi ka qenë ai i barazimit në 1-1, aty arritëm të merrnim kampionatin”.
Jasir Asani- “Kemi pasur momente të bukura edhe në derbi, kemi diskutuar për një faull në Air Albania. Kemi folur atëherë, por tani nuk e kujtojmë shumë. Ka qenë një ndeshje shumë e bukur”, u shpreh Muçi.
