Është zbuluar identiteti i shqiptarit, i cili u arratis mëngjesin e sotëm nga burgu i Teramos në Abruzo, Itali. Mediat vendase bëjnë me dije se bëhet fjalë për 40-vjeçarin Roland Dedja
Dedja akuzohet për vrasjen e shqiptarit Shpëtim Cupa në Brescia, Itali, ndërsa mësohet se ka jetuar më parë në Spanjë, Francë.
Sakaq mësohet se më parë ka përdorur një pasaportë çeke false nën emrin Kamill Hladky. Kjo nuk është arratisja parë që 40-vjeçari ka kryer, pasi edhe në vitin 2010 është arratisur nga burgu i Pisas, së bashku me një tjetër shqiptar.
Forcat e policisë janë duke e kërkuar në zonën e Abruzzos ku dyshohet se fshihet 40-vjeçari shqiptar pas arratisjes nga burgu.
Sipas asaj që shkruajnë mediat italiane, 40-vjeçari është ndihmuar nga një dron i jashtëm.
Në deklaratën e policisë thuhet se “Dyshohet se i burgosuri është arratisur falë ndihmës së një droni të jashtëm, i cili i ka siguruar mjetet e nevojshme për t’u larguar nga burgu i Teramos. Ngjarja ka ndodhur në orët e para të mëngjesit të sotme. Për momentin janë duke u ekzaminuar regjistrimet e të gjitha kamerave të IEVP Teramo për të kuptuar dinamikën e saktë të arratisjes së kryer nga i burgosuri shqiptar”.
Ngjarja ka shkaktuar reagime në Itali, ku shumë prej tyre, përfshirë dhe mediat e kanë cilësuar ngjarjen si ‘aksion i denjë për një film amerikan’.
