Pas shumë orësh pritje, kryeministri Edi Rama më në fund ka reaguar për vrasjen e policit në veri të Kosovës për të cilën thotë se është ‘kambana më e madhe e alarmit’.
Kreu i qeverisë shqiptare i bën thirrje komunitetit euroatlantik që me forcën imponuese të ulë në një tryezë dialogu Kosovën dhe Serbinë.
Ndryshe nga faktorët politik në Kosovë, Rama në asnjë rresht nuk guxon që të hedhë akuza ndaj Beogradit zyrtar të akuzuar si iniciues të këtij sulmi.
Për shkak të miqësisë së tij, kryeministri Edi Rama në asnjë moment nuk përmend Vuçiçin i cili akuzohet si orkestrues i këtij sulmi të paprecedent që përshkallëzon tensionet në veri të Kosovës.
- Ngjarja e rëndë shton tensionet në veri të Kosovës
Personi që shihni në foto është efektivi i policisë në Kosovë, Afrim Bunjaku, që mbeti i vrarë në orët e para të mëngjesit të së dielës në veri të Kosovës.
Efektivi Afrim Bunjaku mbeti i vrarë pas një sulmi te armatosur në drejtim të makinës së policisë, e cila kishte shkuar në fshatin Banjska të Leposaviçit pas informacionit se dy kamionë pa targa kishin bllokuar rrugën.
Por pas mbërritjes në vendin e ngjarjes, policët janë përballur me një sulm të armatosur, ku për pasojë vdiq njëri prej tyre ndërsa një tjetër u plagos.
Presidentja e Kosovës, Vjosa Osmani, ka ndërprerë vizitën zyrtare në New York, si rrjedhojë e ngjarjeve të fundit në veri.
Kurti dhe Osmani njëzëri bëjnë me dije se këto sulme janë të organizuara dhe ekzekutuara nga Beogradi, ndërsa theksoi se dëshmojnë edhe njëherë fuqinë destabilizuese të bandave kriminale.
Nga Sali Berisha, deputetët e Partise Demokratike deri tek Ilir Meta të gjithë faktorët kryesor të opozitës ne SHqiperi kanë reaguar për këtë ngjarje të rëndë, madje kanë shprehur edhe ngushëllimet për familjen e Afrim Bunjakut i cili mbeti i vdekur nga sulmi.
Vrasja e policit në Kosovë/ Heshtje skandaloze e qeverisë shqiptare, Vuçiç i “kyç gojën” Ramës
