Java e dytë e Superligës së volejbollit të femrave është hapur dje me fitore të pastra në shtëpi nga Tirana dhe Vllaznia. Vajzave bardheblu u kanë mjaftuar vetëm 50 minuta lojë për të mundur Teutën 3-0 në sallën “Farie Hoti”.
Ashtu sikurse pritej, kryeqytetaset e dominuan ndeshjen nga fillimi e deri në fund, ndërsa trajneri Gurabardhi u dha hapësira edhe lojtareve të stolit. Diferencat ishin të mëdha në të tria setet, me Tiranën që i fitoi ato thellë, përkatësisht në shifrat 25-9, 25-12 dhe 25-10.
Me 13 pikë të realizuara për bardheblutë, kubanezja Sanches ishte lojtarja e ndeshjes, mbështetur nga Uenda Bytyçi dhe Kejda Kodra me nga 9 pikë secila. Kjo ishte fitorja e dytë në kampionat për Tiranën, sukses që i ngjit kryeqytetaset momentalisht në vend të parë.
Në ndeshjen tjetër të zhvilluar në Shkodër, Vllaznia mori 3 pikët e para në kampionat, teksa likuidoi Barletin me rezultatin 3-0. Shkodranet e filluan vrullshëm takimin ndaj universitareve të përgjumura, duke fituar thellë 25-10 në setin e parë.
Në dy setet e tjera rivaliteti në parket ishte i lartë, por Vllaznia u tregua më e saktë në momentet vendimtare të lojës, për të fituar në fraksion e dytë 25-23 dhe në të tretin 26-24 pas pikëve shtesë.
Klodeta Zhivani me 17 pikë, Stela Agolli me 15 dhe Edna Erkoçi me 14, udhëhoqën sulmin kuqeblu në suksesin e parë në kampionat. Në radhët e Barletit asnjë prej lojtareve nuk mundi të mbërrinte në kuotë dyshifrore pikësh, me ekipin universitar që pëson disfatën e parë sezonale.
Java e dytë e Superligës do të kompletohet sot me dy takimet e mbetura, teksa fillimisht Partizani përballet me Lushnjën në “Asllan Rusi”, ndërsa në Korçë do të luhet derbi ndërmjet Skënderbeut vendës dhe Pogradecit. Korçaret e Orlando Kojës rikthehen në kampionat pas eksperiencës në Kupën Ballkanike në Gjilan, në të cilën shënuan një fitore dhe dy humbje, duke u renditur të tretat.
