Një 24 vjeçar nga Fieri, është arrestur ditën e sotme nga policia pasi akuzohet për transport emigrantësh.
Blutë bëjnë me dije se në pranga ka rënë shtetasi, Kristian Plaku, 24 vjeç pasi është kapur në sajë të operacionit të koduar “Aksi” duke transportuar ilegalisht 8 emigrantë nga Nepali.
“Shtetasi K. P. u kap në flagrancë, në aksin rrugor “Lushnjë-Rrogozhinë”, teksa drejtonte një automjet tip “Benz”, me të cilin transportonte 8 emigrantë nga Nepali. Nga veprimet hetimore dyshohet se 24-vjeçari po i transportonte këta shtetas, drejt Shkodrës, kundrejt shumës 500 euro/person, në mënyrë që ata të kalonin kufirin, në kundërshtim me ligjin, drejt vendeve të BE-së.
Gjithashtu, nga verifikimet rezultoi se 24-vjeçari ishte i kërkuar nga Policia e Vlorës, pasi më datë 29.08.2023, në fshatin Vrion, ka braktisur automjetin tip “Range Rover” me të cilin transportonte emigrantë, me qëllim kalimin e kundërligjshëm të kufirit. Automjeti tip “Benz” u sekuestrua me cilësinë e provës materiale, së bashku me 7 celularë”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
