Anëtari i Këshillit Bashkiak të Tiranës, Tedi Blushi i është drejtuar ditën e sotme me një kërkesë kryebashkiakut të Tiranës, Erion Veliaj dhe drejtorit të UKT-së, Elton Kacidhja, në lidhje me masat e marra për problematikat me ujin me të cilat po përballen qytetarët në kryeqytet.
Këtë gjë e ka bërë me dije vetë Blushi përmes një postimi në rrjetet sociale, i cili shkruan se u drejtua me këtë kërkesë nisur nga gjendja shumë problematike e furnizimit me ujë të pijshëm në Tiranë, nga fakti se furnizimi me ujë 24 orë nuk u realizua kurrë dhe në kushtet kur cilësia e ujit është skandaloze, pavarësisht çmimit të lartë.
Në kërkesë janë 12 pyetje për Veliajn dhe Kacidhen, ku kërkon të dijë se në cilat zona të Tiranës garantohet uji i pijshëm 24 orë, në çfarë parametrash e garantojnë ujin e pijshëm, etj.
“Nisur nga gjendja shumë problematike e furnizimit me ujë të pijshëm në Tiranë, të raportuar periodikisht edhe nga qytetarët, nga fakti se furnizimi me ujë 24 orë nuk u realizua kurrë dhe në kushtet kur cilësia e ujit është skandaloze, pavarësisht çmimit të lartë, ju drejtova sot Kryetarit të Bashkisë Tiranë, Erion Veliaj dhe Drejtorit të UKT, Elton Kacidhja me një kërkesë zyrtare për masat e marra për zgjidhjen e kësaj situate shqetësuese.
Shëndeti dhe jeta e qytetarëve të Tiranës, si dhe shërbimi dinjitoz që ata meritojnë nga Bashkia janë i vetmi prioritet!” shkruan Blushi.
