Betonizimi dhe ngushtimi i hapësirave publike është një problem shqetësues për të gjithë qytetarët në Republikë e Shqipërisë.
Nga ndërtimet pa kriter nuk vuan vetëm Tirana por edhe Saranda e cila vitet e fundit nën qeverisjen e socialistëve është shndërruar në një “xhungël” të vërtetë. Problematika del në pah më së miri gjatë sezonit të verës, ku Saranda e betonizuar pa asnjë plan të mirëfilltë urbanistik ku mungon infrastruktura rrugore ia “nxin jetën” pushuesve që presin me orë të tëra në trafik të rënduar, kjo për shkak të ndërtimeve pa kriter dhe ngushtimit të rrugëve.
Ditën e sotme kreu i Partisë Demokratike, Sali Berisha publikoi një video për të demonstruar “katastrofën” natyrore që vazhdon të ndodhë në Sarandë.
Një ndërtesë e lartë gjigante ka betonizuar të gjithë vijën bregdetare aq sa bllokon edhe rrezet e diellit të cilat do të bien vetëm gjatë mesditës për shkak të “gllabërimit” që i ka bërë ajo që Berisha e quan “mafia e betonit dhe drogës”.
“Rrënimi i Sarandës nga mafia e betonit dhe drogës!”, shkruan Berisha teksa publikon videon më poshtë:
