Presidenti i Komitetit Olimpik Ndërkombëtar Shqiptar, Fidel Ylli foli mbrëmjen e sotme për rikthimin e basteve online.
I ftuar në emisionin “Now”, ai pati kritika ndaj kreut të qeverisë Edi Rama duke thënë se në një moment i mbylli të gjitha kazinotë dhe pas një viti i hapi prapë. Sipas tij, sot në Tiranë ka 4 kazino dhe sipas tij, qeveria i hap këto të fundit për t’i dhënë një stimul hoteleve me 5 yje.
Fidel Ylli deklaroi dhe se bastet sportive nuk janë mbyllur kurrë, duke pranuar kështu dështimin e qeverisë me këtë nismë.
“Ligji i kompanive të basteve ka qenë një ligj me standarde europiane. Në një moment doli jashtë kontrollit. Qeveria bëri mirë që i mbylli por në një kohë shumë të shpejtë duhet të ngrinte një grup pune. Pas një viti, me një të rënë të lapsit, mbylli dhe kazinotë dhe lojërat e fatit. Pas një viti hapi kazinotë. Bastet nuk janë mbyllur kurrë, shumica kanë funksionuar dhe funksionojnë dhe e dyta ke 4 kazino në Tiranë. Qeveria hapi kazinotë për t’i dhënë një stimulim hoteleve me 5 yje dhe basti është dhe atraksion”-tha ai.
