Një parakalim i gabuar dyshohet të jetë shkak i aksidentit të ndodhur orëve të mëngjesit në “Rrugën e Kombit”, si pasojë e të cilit Gëzim Lazri, efektiv policie, humbi jetën.
Makina që drejtonte efektivi është përplasur me një tjetër automjet që drejtohej nga një shtetas malazez, i cili ka mbetur i plagosur.
“Rreth orës 07:20, në aksin rrugor Rrëshen-Rrubik, automjeti tip ‘Chevrolet’ me drejtues shtetasin malazez M.F., është përplasur me automjetin tip ‘Benz’ me drejtues shtetasin G.L. 56 vjeç, (efektiv policie pranë Komisariatit të Policisë Mirditë i cili sapo kishte lënë shërbimin dhe po kthehej në banesë). Si pasojë e këtij aksidenti, ka humbur jetën punonjësi i policisë shtetasi G.L. Ndërsa drejtuesi i automjetit tjetër shtetasi M.F., ndodhet në spital për ndihmë mjekësore”, njoftoi policia.
Paraprakisht, shtuan të njëjtat burime, dyshohet se shkaku i aksidentit rrugor ka qenë parakalimi i gabuar në shkelje të rregullave të qarkullimit i automjetit tip “Chevrolet” që drejtohej nga shtetasi malazez.
Grupi hetimor ndodhet në vendin e ngjarjes dhe nën drejtimin e Prokurorit, vijon hetimet për zbardhjen e plotë të rrethanave dhe shkakut të aksidentit, mbyllet njoftimi i bluve.
