Kreu i LZHK-së Dashamir Shehi tha për MCN Live se ai do të jetë gjithmonë në mbështetje që opozitës që lufton kundër qeverisë, e cila është e korruptuar dhe se nëse nuk është ky qëllimi ai nuk bëhet palë as me shumicën dhe as me pakicën.
Shehi deklaroi se është kundër rritjes së pagës së anëtarëve të Gjykatës Kushtetuese, jo për faktin se ky vendim do të shkatërrojë ekonomikisht vendin, por që do ishte më mirë nëse do të bëhej një rishikim për të gjithë sistemin.
Shehi tha më tej se Basha dhe kushdo tjetër është i ftuar t’i bashkohet ‘luftës’ kundër Ramës, por theksoi se ai nuk mund të jetë më një këmbë nga opozita dhe me një këmbë nga qeveria,
“Ne mbështesim opozitën kundër Edi Ramës dhe për këtë jemi dakord të gjithë dhe shpresoj që kjo t’i shtyjë përpara këto takime. Nuk mbështesim as gjysmën më të madhe, as gjysmën më të vogël. Nëse beteja është kush mund tjetrin brenda opozitës nuk na kanë me vete, nëse beteja është të mundim Ramën na kanë me vete. Ka ca shenja pozitive, do shohim Bardhin deri ku do ta çojë idenë. Jemi dakord të zgjerohet duke përfshirë dhe palën tjetër, zotin Basha, nuk jam nga ata që thonë ky është ‘tradhtari’, ky është i rusëve. Ne kemi një kundërshtar të përbashkët, që është Rama, PS, qeveria e korruptuar. Këta janë armiqtë. Brenda vetes kemi diferenca të mëdha, i vetmi fill që na bashkon është lufta kundër Ramës, nëse braktiset kjo luftë, me këtë lloj historie nuk na kanë me vete. Brenda takimeve diskutohet mënyra si do dalë opozita në Parlament, do të jetë më i unifikuar qëndrimi, ku do goditet më shumë qeveria, ku do të japim një alternativë. Këta vjedhin të gjithë. Puna është të bëjmë denoncim të vazhdueshëm, por ne nuk zëvendësojmë Prokuroritë. Ca letra po lëvizin, janë bërë kaq pis letrat, dhe ato që duan të mbyllin duken shenjat. Jemi përpara ndërkombëtarëve dhe shpresoj që këtë sistem drejtësie mos ta kenë vetëm në kontroll plotësisht vetëm krahu i qeverisë, por dhe ndërkombëtarët të bëjnë presion.
Ftoj Bashën dhe të tjerët të spostojnë betejën kundër qeverisë dhe jo kundër segmenteve të tjera. Mua s’ më pëlqen as Basha as Berisha, por mendoj që ata që duan të japin kontribut kundër Ramës e kanë hapësirën e mjaftueshme. Dhe Basha mund të japë kontribut. A do të mbështesë nismat e qeverisë kur ka ardhur puna që qeveria do të rrisë pagat e nëpunësve dhe unë e mbështes. Nëse Rama do thotë nesër rrisim pensionet dhe unë ngre dy duart, por nëse flasim për të rritur pagat e 7-8 vetëve, për t’i bërë në mënyrë disporpocionale unë nuk jam dakord. Jam dakord që brenda sistemit të drejtësisë të rishihen në bllok të gjithë rrogat. Pasi nëse një prokuror që do hapë letrat e ministrave dhe kriminelëve e ka rrogën sa gjysma e këtyre nuk më duket korrekte. GJK është gjykatë e nderuar do ishte dhe më e nderuar nëse s’do ishin vetëm ca çuna dhe goca të rinj. Nuk shkatërrohet ekonomikisht Shqipëria. Në demokraci normale një pjesë janë opozitë dhe një pjesë janë në pushtet, nuk mund të ketë një këmbë andej dhe një këmbë andej s’është serioze. Shpresoj që Basha dhe grupi që ka përqark nuk mund ta bëjnë këtë gabim. Do ishte vetasgjësim i një ideje ndryshe. Nëse je në opozitë nuk mund të jesh njëkohësish dhe në krahun tjetër. Nëse thonë të ngremë pensionet unë jam i parë.
I pyetur për projektligjin për lojërat e fatit, Shehi tha se e mira do të ishte që ky sektor të rregullohej me ligj, megjithëse shtoi se nuk ka transparencë.
“Kemi qenë kundër lojërave të fatit. Kjo qeveria bëri një show të madh që e quajti “Fundi i marrëzisë”, pastaj e ktheu “gjysma e marrëzisë”, pastaj e ktheu të plotë. Ky është realitet që ekziston në Shqipëri. Luajnë njerëzit përditë këtu. E mira do ishte të rregullohej me ligj. Është një e keqe që po shkojmë ta rregullojmë me ligj. Këta e kanë sjellë në mënyrë amatore. Nuk e di njeri sa zyrtarisht luhet. Nga kjo gjë zyrtare çfarë do marrë shteti, që t’ja ndajë sportit dhe aktivitetet e tjera. Nuk ka asnjë lloj transparence. Luhet 200 milionë në vit dhe sporti mund të marrë 10-15 milionë. Po vazhduan ta delegojnë në duar të privatëve, në duar të pasigurta një sektor që është i madh dhe mbart rreziqe nga brenda unë them që kjo nuk është më fundi i marrëzisë, por fillimi. Realiteti është që është një sektori informal që luan për hesap të vet në Shqipëri. Tani do marrim një vendim politik, do e vazhdojmë këtë punë”.
