Ministrja e sapo shkarkuar e Bujqësisë, Frida Krifca është kallëzuar në SPAK nën dyshimet për korrupsion lidhur me shpërndarjen e fondeve të IPARD.
Kallëzimi u depozitua këtë të martë në Prokurorinë e Posaçme nga “Nisma Thurrje”, kreu i së cilës Endi Shabani tha se fermeri shqiptar dhe konsumatori shqiptar janë tradhtuar nga qeveria e vet.
Në një prononcim për gazetarët jashtë ambienteve të prokurorisë, Shabani u shpreh se në kallëzim janë akuzuar për “shpërdorim detyre” ish-ministrja Krifca, kreu i AZHBR-së dhe zyrtarë të tjerë, ndërsa prova më kryesore është raporti i OLAF.
“Sot në mëngjes kemi depozituar në SPAK një kallëzim për abuzimet që është bërë me fondet e AZHBR, me fondet e IPARD-it, por edhe me fondet e ndihmës kombëtare. Ne i kërkojmë SPAK që të hetojë ish ministren e bujqësisë, drejtuesit e AZHBR-së dhe zinxhirin vendimmarrës që janë përgjegjës për atë vendim ku ne përjashtohemi nga fondet e BE. Ne shpresojmë që kjo të jetë një vijë ndarëse. Një vijë e pakalueshme për ty arsye. E para, këtu jemi përpara një rasti ku po tradhtohet fermeri shqiptar. Edhe kur ka fonde nga BE edhe këto lekë i vjedhin, i ndajnë me të njëjtin grup oligarkësh. Ne i kërkojmë SPAK që ta vendosë një kufij të pakalueshëm në këtë pikë”, tha Shabani.
“E dyta jemi para një vije që nuk duhet të kapërcehet kur Shqipëria tradhtohet në rrugën e integrimit të BE. Ndërkohë ne jemi të fundit në rrugën e integrimit, sepse këta e kanë marrë peng dhe ky është një rast. Ne përjashtoheni nga fondi i BE që të pasurohen disa persona. Ne besojmë që SPAK do të vendosë këtë vijë ndarëse”, shtoi.
Ndërsa Pano Soko deklaroi se veç veprën penale të “shpërdorimit të detyrës”, ka edhe indicie për korrupsion për të kallëzuarit.
”Është kallëzuar gjithë zinxhiri drejtues që ka pasur përgjegjësi administrative për të kontrolluar fondet dhe procedurat, bazuar në raportin e OLAF-it”, u shpreh Soko.
Ministrja e Bujqësisë Frida Krifca u vu në qendër të vëmendjes në muajin korrik pasi Komisioni Europian njoftoi se kishte vendosur të ndërpresë përkohësisht rimbursimet ndaj qeverisë shqiptare për financimet e projekteve në bujqësi të realizuara në kuadër të Programit IPARD II për mbështetjen e bujqësisë dhe zhvillimit rural. Vendimi ishte marrë “bazuar në informacionin fillestar të dhënë nga Zyra Evropiane Kundër Mashtrimit [OLAF], pas një hetimi mbi akuzat për korrupsion në lidhje me zbatimin e programit IPARD II”, bëri të ditur Delegacioni i BE-së në Tiranë.
Krifca ishte një ndër ministret që për të cilën kreu i qeverisë Edi Rama njoftoi shkarkimin nga detyra gjatë Asamblesë së PS-së, zhvilluar para 1 jave. Vendimi i shkarkimit të Krifcës i dekretuar nga kreu i shtetit Bajram Begaj mori dritën jeshile dje në Kuvend me 107 vota pro.
