Ka fillur këtë të hënë, viti i ri shkollor 2023-2024 në të gjitha institucionet e arsimit parauniversitar. Për herë të parë, në bankat e shkollës do të ulen rreth 29 mijë nxënës, ndërsa në klasat e 10-ta rreth 27 mijë nxënës.
Nga të dhënat e siguruara deri më tani, edhe këtë vit, ka vijuar trendi i rënies së numrit të nxënësve të regjistruar në shkolla. Në disa qarqe të vendit raportohet për qindra nxënës më pak të regjistruar krahasuar me një vit më parë.
Në Vlorë, në bankat e shkollës u ulën 12165 nxënës, krahasuar me 12350 një vit më parë. Në klasat e para vitin e kaluar filluan mësimin 1083 nxënës (845 në shkollat publike, 238 në shkollat private) ndërsa këtë vit fillojnë mësimin 1025 nxënës (809 në shkollat publike 216 në shkollat private). Në klasat e dhjeta, ku vihet re numri i ulur ndjeshëm se një vit më parë, filluan mësimin në gjimnaze vitin e kaluar 1175 nxënës (688 publike, 235 private, 252 profesionale) ndërsa këtë vit do të fillojnë klasën e dhjetë 952 nxënës (431 publike, 246 private, 275 profesionale). Në klasat e para këtë vit do të ulen 58 nxënës më pak, ndërsa në klasat e dhjeta 223 nxënës më pak.
Edhe Elbasani këtë vit do të ketë më pak nxënës që ulen në bankat e klasës së parë dhe të dhjetë. 100 më pak në klasën e parë dhe 50 me pak në të dhjetën.
Në Shkodër, viti shkollor ka nisur me 700 nxënës më pak. Në Lezhë po ashtu.
I njëjti trend edhe në Korçë. Për herë të parë në bankat e shkollës për këtë vit janë ulur 1526 nxënës ndryshe nga viti i kaluar kur numri i tyre shkonte në 1754 nxënës. Këtë vit edhe pse ka pasur ndryshime ligjore ku në klasën e parë janë regjistruar edhe nxënës të cilët ende nuk kanë mbushur moshën 6-vjeçare duket se numri është tepër i ulët. Në Gjirokastër raportohet e njëjta situatë.
Raportet e INSTAT, por edhe institucioneve të huaja kanë treguar një trend vijues rënës të rritjes së popullsisë, lindshmërisë dhe rritjes së emigrimit.
