Kuvendi ka miratuar këtë të Hënë dekretet e Presidentit Bajram Begaj për ndryshimet në qeveri, të urdhëruara nga kryeministri Edi Rama gjatë Asamblesë së PS-së.
Seanca që zgjati për rreth 10 minuta kishte në rendin e ditës vetëm votimin e dekreteve. Opozita kërkoi debat përmes një shkrese drejtuar kryeaprlamentares nga deputeti Gazment Bardhi para nisjes së seancës. Kërkesë që u përsërit gojarisht edhe nga deputetë të tjerë të opozitës në Kuvend, të cilët kërkuan fjalën për procedurë. Ndërkohë, kryeparlamentarja Nikolla tha se seanca të tilla, edhe më herët janë zhvilluar vetëm me votim dhe kështu u procedua.
Fillimisht, u votua për shkarkimet e ministrave (që u miratuan me shumicë të theksuar) dhe më pas emërimet e reja. Në seancën e sotme nuk u votua për shkarkimin e Delina Ibrahimajt si ministre e Financave dhe emërimin në vend të saj të Ervin Metes për procedura teknike lidhur me detyrën e këtij të fundit. Ky ndryshim pritet të miratohet në seancën e radhës.
Ndryshimet në qeveri nga Rama kanë shtuar zëra se ministrat e shkarkuar mund të jenë subjekte të mundshme të ndalimit nga SPAK.
Pas seancës, kryetari i PD-së Sali Berisha tha në një prononcim për gazetarët jashtë Kuvendit se “të gjitha ndryshimet e qeverisë kishin diktat krimin”.
“Me një fjali ndryshimet e sotme të qeverisë i shoh përpjekje për të larë pak fytyrën, por duke e nxirë atë edhe më shumë”, theksoi ai.
Një qëndrim të ngjashëm mbajti dhe Gazment Bardhi, sipas të cilit, ministrat e rinj janë “de facto” kukulla në duart e kryeministrit Edi Rama. “Shqiptarët e kanë kuptuar se sa do makijazh që të bëjë Rama në kabinetin , vulën e korrupsionit që mban kjo qeveri nuk e heq dot. Nuk ka asnjë rëndësi së si quhen ministrat e rinj apo të vjetër të Ramës, ato njëlloj do të vazhdojnë të mbrojnë korrupsionin e Ramës. Problemi qëndron te Rama e jo te kabineti“, tha deputeti demokrat.
Ndryshimet në qeveri
- Ministër i Financave dhe Ekonomisë – Emërohet Ervin Mete; Largohet Delina Ibrahimaj
- Ministër Shteti për Sipërmarrjen dhe Klimën e Biznesit – Emërohet Delina Ibrahimaj; Largohet Edona Bilali
- Ministre e Shëndetit dhe Mirëqenies Sociale – Emërohet Albana Koçiu; Largohet Ogerta Manastirliu
- Ministër i Arsimit dhe Sporti – Emërohet Ogerta Manastirliu; Largohet Evis Kushi
- Ministër për Europën dhe Punët e Jashtme – Emërohet Igli Hasani; Largohet Olta Xhaçka.
- Ministër i Bujqësisë dhe Zhvillimit – Emërohet Anila Denaj; Largohet Frida Krifca
- Ministër i Pushtetit Vendor (Ministri e re): Emërohet Arbjan Mazniku
- Ministria e Shtetit për Standardet dhe Shërbimet (Shkrihet) – Largohet Milva Ekonomi
Votimi
- Kuvendi miratoi me 95 vota pro dhe 1 kundër shkarkimin nga detyra të ministres për Evropën dhe Punët e Jashtme, Olta Xhaçka.
- Kuvendi miratoi me 110 vota pro shkarkimin e ministres së Shëndetësisë dhe Mbrojtjes Sociale, Ogerta Manastirliu.
- Kuvendi miratoi me 99 vota pro, 3 kundër dhe 1 abstenim shkarkimin e ministres së Arsimit dhe Sportit, Evis Kushi.
- Kuvendi miratoi me 107 vota pro, shkarkimin e ministres së Bujqësisë dhe Zhvillimit Rural, Frida Krifca.
- Kuvendi miratoi me 102 vota pro dhe 4 kundër, shkarkimin e ministres së Shtetit për Mbrojtjen e Sipërmarrjes, Edona Bilali.
- Kuvendi miratoi me 98 vota pro, 2 abstenime dhe 2 kundër shkarkimin e ministres së Shtetit për Standardet dhe Shërbimet, Milva Ekonomi.
- Kuvendi miratoi me 73 vota pro dhe 35 kundër emërimin e Arbian Maznikut si ministër Shteti për Pushtetin Vendor.
- Kuvendi miratoi me 73 vota pro, 1 abstenim dhe 32 kundër emërimin e Albana Koçiut si ministre e Shëndetësisë dhe Mirëqenies Sociale.
- Kuvendi miratoi me 74 vota pro dhe 33 kundër emërimin e Igli Hasanit si ministër për Evropën dhe Punët e Jashtme.
- Kuvendi miratoi me 72 vota pro, 1 abstenim dhe 35 kundër emërimin e Ogerta Manastirliut si ministre e Arsimit dhe Sportit.
- Kuvendi miratoi me 73 vota pro dhe 27 kundër emërimin e Anila Denajt si ministre e Bujqësisë dhe Zhvillimit Rural,
- Kuvendi miratoi me 95 vota pro, 1 abstenim dhe 5 kundër projektvendimin “Për lirimin nga detyra të Ervin Metes si kryetar i Bordit të Autoritetit të Mbikëqyrjes Financiare si dhe nga funksioni i Drejtorit të Përgjithshëm Ekzekutiv”.
