Numri i të vdekurve është rritur në të paktën 41 pas stuhive të forta në Brazilin jugor, tha qeveria rajonale dje në mbrëmje.
“Të paktën 46 persona të tjerë janë raportuar të zhdukur”, tha qeveria e shtetit të Rio Grande de Sul. Shumica e viktimave ishin në komunat Muçum dhe Roca Sales.
Sipas qeverisë, pothuajse 150 000 banorë ishin prekur nga stuhitë dhe gati 3 200 të tjerë kishin mbetur të pastrehë.
Zona u godit nga shira të dendura dhe erëra të forta, në fillim të javës.
Lumenjtë shpërthyen brigjet e tyre dhe sipërfaqe të mëdha toke u përmbytën.
“Në zonën e përmbytur në veri-perëndim të kryeqytetit të shtetit Porto Alegre, njerëzit u shpëtuan nga çatitë e shtëpive të tyre”, sipas raporteve të medieve.
Të shtunën, autoritetet planifikuan të shpërndanin ilaçe dhe furnizime mjekësore në Luginën e Lumit Taquari.
“Qytetarët nga pjesë të tjera të shtetit kishin dhuruar aq shumë ushqime, ujë, veshje, batanije dhe dyshekë, saqë Mbrojtja Civile kishte nevojë për përforcime për t’i shpërndarë të gjitha”, tha qeveria.
Rio Grande do Sul është shteti më jugor i Brazilit dhe një nga më të pasurit në vend.
