Janë zbardhur detaje të reja nga aksioni i natës së kaluar i Policisë së Tiranës për goditjen e një grupi kriminal që vepronte në zonën e “Kodrës së Diellit” për shpërndarjen e lëndeve narkotike, pasi ishin lëshuar 9 urdhër-arreste nga prokuroria.
Personat që shihni në foton e mësipërme janë çifti që e drejtonte grupin, më konkretisht shtetasit Herald Rexhepaj, 35 vjeç dhe Viola Bendaj, 31 vjeçe. Veç tyre në pranga u vunë dhe shtetasit
Arolf Harizi, 19 vjeç, Arlind Aga, 20 vjeç, Xhersildo Arifllari, 21 vjeç, Dashamir Shehu, 46 vjeç, Devis Saliaj, 19 vjeç, dhe Indrit Gjoshi, 22 vjeç, të gjithë banues në Tiranë. Ndërsa në kërkim u shpall në kërkim shtetasi K. R., 29 vjeç, banues në Tiranë.
Nga hetimet ka rezultuar se shtetasit e mësipërm, në bashkëpunim me njëri-tjetrin, siguronin lëndë të dyshuara narkotike të llojit kokainë dhe kanabis, në sasi të mëdha, dhe më pas i shitnin ato në zona të ndryshme të Tiranës, kryesisht në afërsi të lokaleve të natës dhe të vendeve që frekuentohen nga të rinjtë.
Nga përgjimet ka rezultuar se grupi komunikonte me kode si “më sill 3 birra” ose “shko merr fantat”, kur iu shisnin lëndë narkotike të rinjëve, teksa mësohet se kodin “birra” e përdornin për kokainën, ndërsa kodin “pica” për kanabisin.
Në cilësinë e provës materiale, uniformat blu sekuestruan 650 doza cannabis sativa, 150 doza lënde narkotike kokainë, 1 kg lëndë e dyshuar narkotike cannabis sativa, qindra qese farmaceutike që shërbejnë për paketimin e lëndëve narkotike, dy peshore elektronike, dhe 5 aparate celulare.
