Janë zbardhur detaje të reja nga arrestimi i 48-vjeçarit Darjo Bruçi nga Mati, i cili pretendonte se bashkëshortes së tij, 33 vjeçe, i kishin bërë magji dhe kishte paguar një hoxhë nga Kosova, Kujtim Popaj, për t’ia nxjerrë.
Për t’i nxjerrë magjinë e pretenduar, 33-vjeçarja dhunohej në mënyrë barbare si nga bashkëshorti i saj, po ashtu edhe nga hoxha, i cili pretendonte për t’ja nxjerrë magjinë me goditje me kaçavidë. Ky rit i çuditshëm fetar nga hoxha u pa nga pamjet filmike të gjetura nga efektivët e policisë në telefonin e 48-vjeçarit.
Mësohet se ka qënë nëna e bashkëjetueses së Darjo Bruçit e para që nga Franca denoncoi dhunën barbare ndaj bijës së saj. Policia zbarkoi menjëherë në shtëpinë e tyre në Mat dhe gjeti me shenja dhune gjithandej 33-vjeçaren.
Hoxha nga Kosova, Kujtim Popaj është shpallur në kërkim nga policia për mashtrim dhe akoma nuk është lokalizuar për t’u marrë në pyetje. Për këtë, autoritetet tona po bashkëpunojnë me ato të Kosovës. Burime bëjnë me dije se ritet e çuditshme Popaj i ka kryer kundrejt pagesës 600 euro dhe dhuratave të tjera.
Akoma është e paqartë nëse përmes ritit me kaçavidë që goditet gjithandej në trup 33-vjeçarja nga Popaj ka pasur dëmtime dhe kjo do të qartësohet në vijim të hetimeve, të cilat mund t’i shtojnë edhe akuzën e dhunës 37-vjeçarit kosovar.
Ndërkohë, Darjo Bruçi rezulton të ketë ndërruar emrin, pasi më herët e ka pasur Agron Bruçi dhe ka precedent të theksuar kriminal brenda vendit, për kanosje dhe kundërshtim të policisë. Ai ka jetuar edhe jashtë vendit, ku ka të regjistruar po ashtu precedent kriminal për kanosje dhe trafikim të narkotikëve.
